दिल्लीहून पाटण्याला जाणाऱ्या 'इंडिगो'च्या विमानात (Indigo Airlines) एअर होस्टेससोबत (Air Hostess) विनयभंग झाल्याची घटना समोर आलीये. बिहारमधील (Bihar) तीन प्रवाशांनी दारूच्या नशेत एअर होस्टेससोबत ही घटना घडवली.

यादरम्यान त्यांनी गोंधळ घातला आणि फ्लाइट कॅप्टनलाही मारहाण केल्याचा आरोप आहे. तिघंही स्वत:ला बिहारमधील सत्ताधारी पक्षाच्या राष्ट्रीय अध्यक्षाच्या जवळचे असल्याचे सांगत होते. ही घटना गेल्या रविवारी रात्री घडलीये.

मिळालेल्या माहितीनुसार, आरोपी दारू पिऊन IndiGo फ्लाइट 6E-6383 मध्ये चढले. रात्री 10 वाजता दिल्लीहून पाटण्याला पोहोचल्यानंतर दोघांना विमानतळाच्या आत अटक करण्यात आली. सीआयएसएफनं नितीन आणि रोहितला पकडून विमानतळ पोलिस स्टेशनच्या ताब्यात दिलं, तर पिंटू नावाचा तरुण फरार आहे. आरोपींची ब्रेथ अॅनालायझर चाचणी करण्यात आली असून, त्यात त्यांनी मद्यपान केल्याची पुष्टी झालीये. तिघंही वैशाली येथील रहिवासी असल्याचं सांगण्यात येत आहे.

इंडिगोच्या अधिकाऱ्यांनी या घटनेबाबत पोलिसांकडं लेखी तक्रार केलीये. विमानतळ पोलिसांकडून त्यांची चौकशी सुरू आहे. असं सांगितलं जातंय की, विमानानं दिल्लीहून बिहारला उड्डाण केलं, तेव्हा आरोपींनी अचानक गोंधळ सुरू केला. हा गोंधळ पाहून एअर होस्टेस त्यांना समजावायला गेली. मात्र, आरोपींनी तिलाही शिवीगाळ करण्यास सुरुवात केली. त्याचवेळी विमानाच्या पायलटलाही मारहाण करण्यात आली. यानंतर विमानाच्या पायलटनं फोन करून संबंधित अधिकाऱ्यांना याबाबत माहिती दिली.