'द काश्मिर फाईल्स' या चित्रपटाची सध्या देशभरात चर्चा सुरू आहे. देशभरात उत्तर प्रदेश, बिहारसह अनेक राज्यांमध्ये हा चित्रपट करमुक्त करण्यात आला आहे. महाराष्ट्रातही चित्रपट करमुक्त करण्याची मागणी भाजपने केली आहे. मात्र सध्या हा चित्रपट राज्यात करमुक्त केला जाणार नसल्याचे महाराष्ट्राचे उपमुख्यमंत्री अजित पवार (Ajit Pawar) यांनी स्पष्ट केले आहे.

उपमुख्यमंत्री अजित पवार यांनी चित्रपट करमुक्त करण्याची भाजपची ही मागणी बुधवारी फेटाळून लावली आणि केंद्राने कर सवलत दिल्यास सर्व राज्यांनाही ती लागू होईल, असे सांगत केंद्राच्या कोर्टात चेंडू टाकला. ते राज्य विधानसभेत 2022-23 च्या वार्षिक अर्थसंकल्पावरील चर्चेला उत्तर देत होते.

महाराष्ट्रात यापूर्वी ‘मिशन मंगल’, ‘तानाजी’ आणि ‘पानिपत’ या चित्रपटांना करसवलत देण्यात आली होती, याची आठवण पवार यांनी यावेळी करून दिली. तसेच त्यांनी "पंतप्रधान नरेंद्र मोदी यांनी काश्मिर फाईल्सचा विशेष उल्लेख केला. जर निर्णय घेतला गेला तर तो संपूर्ण देशाला लागू होईल, अगदी जम्मू आणि काश्मिरपासून कन्याकुमारीपर्यंत चित्रपट करमुक्त असेल," असे ते यावेळी म्हणाले.

या दरम्यान उत्तर प्रदेशचे मुख्यमंत्री योगी आदित्यनाथ यांनी 'द काश्मिर फाईल्स' करमुक्त करण्याची घोषणा केली होती. त्याचप्रमाणे गोवा, मध्य प्रदेश, कर्नाटक, हरियाणा आणि गुजरात या भाजपशासित राज्यांनी हा चित्रपट करमुक्त केला आहे. विवेक अग्नहोत्री यांनी दिगदर्शीत केलेला काश्मिर फाईल्स यामध्ये अनुपम खेर आणि मिथुन चक्रवर्ती यांच्या भूमिका आहेत. याशिवाय या चित्रपटात पल्लवी जोशी, दर्शन कुमार, चिन्मय मांडलेकर, पुनीत इस्सर, भाषा सुंबळी यांसारखे कलाकार आहेत. चित्रपटातील अनुपम खेर यांच्या अभिनयाचे सध्या सर्वांकडून कौतुक होत आहे.