नवी दिल्ली : देशात कोरोनाच्या उद्रेकामुळे अचानक ऑक्सिजनच्या मागणी प्रचंड वाढ झाल्याने त्याचा मोठा तुटवडा निर्माण झाला आहे. त्यामुळे कोरोनाच्या रुग्णांना ऑक्सिजन पुरवठा कमी पडू नये या हेतूनं केंद्र सरकारनं उद्योगांना लागणारा ऑक्सिजनचा पुरवठा थांबवण्याचा निर्णय घेतला आहे. इंडिया टुडेनं याबाबत वृत्त दिलं आहे.

देशात कोरोनाच्या उद्रेकांमध्ये महाराष्ट्र आघाडीवर असून त्यानंतर मध्य प्रदेश, उत्तर प्रदेश, दिल्ली या राज्यांमध्ये ऑक्सिजनचा मोठा तुटवडा निर्माण झाला आहे. यापार्श्वभूमीवर रेल्वे मंत्रालयानं या राज्यांना इतर राज्यांमधून ऑक्सिजनचा पुरवठा करण्याचा निर्णय घेतला आहे. यामध्ये महाराष्ट्राला सर्वाधिक १५०० मेट्रिक टन लिक्विफाईड ऑक्सिजनचा पुरवठा केला जाणार आहे. यासाठी विशेष ऑक्सिजन एक्स्प्रेस चालवली जाणार आहे.

मुख्यमंत्री उद्धव ठाकरे यांनी पंतप्रधान नरेंद्र मोदी आणि रेल्वे मंत्रालयाकडे राज्यासाठी तातडीने ऑक्सिजनच्या पुरवठ्याची मागणी केली होती. यानंतर रेल्वे मंत्रालयानं रेल्वेद्वारे द्रवरुप मेडिकल ऑक्सिजन (LMO) पुरवण्याचा निर्णय घेतला.