केंद्रीय मंत्री अमित शाह यांनी काँग्रेसचा पंतप्रधान पदाचा उमेदवार जाहीर केला आहे. मोदी सरकारच्या कारकिर्दीला ९ वर्षे पूर्ण झाल्याबद्दल गुरुवारी एका जाहीर सभेला संबोधित करताना शाह यांनी जनतेला विचारले की २०२४ मध्ये पंतप्रधान कोण होणार, राहुल बाबा की नरेंद्र मोदी?. त्यामुळे काँग्रेसकडून पंतप्रधान पदासाठी राहुल गांधी उमेदवार असतील, असे शाह यांनी ठरवले आहे.

उद्या पाटणा येथे होणाऱ्या विरोधकांच्या बैठकीपूर्वी अमित शाह यांनी एक प्रकारे २०२४ मध्ये पंतप्रधानपदासाठी मोदी-राहुल यांच्यात स्पर्धा निर्माण करण्याचा प्रयत्न केला. ही त्यांची राजकीय चाल असल्याची चर्चा देखील राजकीय वर्तुळात रंगली आहे.

विरोधी पक्ष एका व्यासपीठावर एकत्र आले तरी पंतप्रधान पदाच्या उमेदवाराच्या  नावावरुन विरोधी पक्षात फूट पडू शकते, असे राजकीय जाणकारांचे मत आहे. विरोधी पक्षातील अनेक नेते पंतप्रधानपदासाठी इच्छुक आहेत. त्यामुळेच शाह यांनी राहुल यांचे नाव घेतल्याचे मानले जात आहे.

यावेळी अमित शाह यांनी मोदी सरकारच्या कामांचा पाढा वाचला. मोदीजींनी ९ वर्षात देशाचा जगात आदर वाढवला आणि देशाची अर्थव्यवस्था जगात ११व्या वरून ५ व्या क्रमांकावर आणल्याचे शाह यांनी सांगितले.

१० वर्षे सत्तेत असलेल्या मनमोहन सरकारने घोटाळे आणि प्रचंड भ्रष्टाचार केला, तर मोदी सरकारवर भ्रष्टाचाराचा एकही आरोप झालेला नाही. काँग्रेसच्या राजवटीत देशात दहशतवादी घटना घडत असत, आमच्या जवानांचा शिरच्छेद केला जात असे. पाकिस्तानला त्याची सवय झाली होती.

अमित शाह म्हणाले, मोदी सरकार असताना त्यांनी काश्मीरमधील पुलवामा आणि उरीमध्ये हल्ले केले, ज्याला सरकारने चोख प्रत्युत्तर दिले. सरकारने काश्मीरमधून कलम ३७० हटवले, जे काँग्रेस सरकार ७० वर्षे हटवू शकले नाही.