नवी दिल्ली : पंतप्रधान नरेंद्र मोदी हे स्वातंत्र भारताचे सर्वात यशस्वी पंतप्रधान असल्याचे गौरवोद्गार केंद्रीय गृहमंत्री अमित शहा यांनी काढले आहेत. त्यांनी देशात रामराज्य आणल्याचे ते म्हणाले. लोकांनी अगदी शांततेत मतदान करुन भाजपला सत्तेत आणले. तेही ३० वर्षानंतर स्पष्ट अशा बहुमताने, असे अमित शहा (Amit Shah) म्हणाले. राजकारणात पंतप्रधान नरेंद्र मोदींना (Narendra Modi) २० वर्षे झाल्यानिमित्त आयोजित कार्यक्रमात अमित शहा बोलत होते. १९६० नंतर, ते २०१४ पर्यंत लोक विचारत होते की ही बहुपक्षीय पद्धत किती दिवस चालेल? लोकांनी भाजपला मतदान केले आणि पहिल्यांदा बिगर काँग्रेस सरकार (Congress Party) पूर्ण बहुमताने सत्तेत आले. पंतप्रधान स्वतःला प्रधानसेवक म्हणून संबोधतात.

पंरतु मी म्हणालो की ते स्वातंत्र भारताचे सगळ्यात यशस्वी पंतप्रधान आहेत, असे शहा म्हणाले. आयोजक मला म्हणाले, की तुमच्याशिवाय मोदीजींना कोण ओळखतयं, मात्र ते चुकलेत. माझ्यापेक्षा देशातील जनता त्यांना चांगले प्रकारे जाणते. या प्रसंगी शहा यांनी मोदी यांच्या संघटनात्मक कौशल्यांची प्रशंसा केली. केंद्रीय गृहमंत्री अमित शहा हे नुकतेच चार दिवसांच्या जम्मू-काश्मीर दौऱ्यावर होते. त्यांनी तेथील जनतेशी संवाद साधला. तीन परिवारांनी काश्मीर खोऱ्याचा ७० वर्षांत विकास केला नाही. मोदींमुळे येथील लोकांना संधी मिळाल्याचे शहा म्हणाले.