चिक्कोडी : स्वातंत्र्याच्या (Independence Day) अमृतमहोत्सवानिमित्त सुरू असलेली 'हर घर तिरंगा मोहीम' (Har Ghar Tiranga 2023) यंदाही सुरू राहणार आहे. त्यासाठी पोस्ट खात्याकडे राष्ट्रध्वजाची मागणी वाढत आहे.

गतवर्षी प्रचंड मागणी वाढल्याने पोस्ट खात्याने (Indian Post) या वर्षी ऑनलाईनद्वारे राष्ट्रध्वज मागणी केल्यास घरपोच सेवा देण्याचा निर्णय घेतला आहे. यंदाही हर घर तिरंगामुळे राष्ट्रध्वजाची मागणी वाढणार आहे. त्यासाठी पोस्ट खाते ऑनलाईन मागणी करणाऱ्या ग्राहकांना घरपोच ध्वज पोहचविणार आहे.

याशिवाय, हर घर तिरंगा मोहिमेसाठी पोस्ट खात्याकडून विविध उपक्रम राबविण्यात येणार आहेत. त्यामध्ये चिक्कोडी शहरात तिरंगा रॅली काढण्यात येणार आहे. प्रत्येक पोस्ट ऑफिसमध्ये हर घर तिरंगा बॅनर दिले जाणार आहे. त्या बॅनरवर स्कॅनर असून त्याद्वारे आपल्याला मागणी नोंदविता येणार आहे. याशिवाय त्या स्कॅनरवरून ऑनलाईन पोस्ट खात्याची माहितीही मिळणार आहे.

आपल्या तिरंगासमवेत फोटोही तेथे शेअर करता येणार आहेत. यावर्षीही पोस्ट खात्याकडे तिरंगा ध्वजाची मागणी अधिक आहे. पण, पुरवठा कमी असल्याने सध्या चिक्कोडी व अथणी या दोन मुख्य पोस्ट कार्यालयात त्याची विक्री करण्यात येत आहे. आणखी ध्वज येणार असल्याची माहिती पोस्ट खात्यातील अधिकाऱ्यांनी दिली.

यावर्षीही २५ रूपये एका ध्वजासाठी आकारले जाणार आहेत. त्यामुळे यावर्षी ऑनलाईन ध्वज मागवून घेतल्यास ग्राहकांना सुलभ होईल, असे पोस्ट खात्याकडून आवाहन करण्यात येत आहे. यंदा १३ ते १५ ऑगस्टपर्यंत हा उपक्रम राबविला जाणार आहे.

यावेळी जास्तीतजास्त लोकांनी यात सहभाग नोंदवावा, यासाठी शहरात रॅली काढणे, सेल्फी पॉईंट सुरू करणे असे उपक्रम होतील. आवश्यकतेनुसार, प्रत्येकांनी पोस्ट खात्यात प्रत्यक्ष येण्यापेक्षा पोस्ट खात्याच्या वेबसाईटवरून ऑनलाईन तिरंगा मागविल्यास त्याच रकमेतून घरपोच तिरंगा पोहच होणार आहे. त्यासाठी कुठल्याही प्रकारचे वेगळे शुल्क आकारले जाणार नाही.

मुख्य कार्यालयात सेल्फी पॉईंट

पोस्ट खात्याकडून चिक्कोडीत सेल्फी पॉईंट सुरू केला जाणार आहे. त्यामध्ये येऊन तिरंगासमवेत फोटो घेऊन ते अपलोड करता येणार आहेत. ऑनलाईन पोस्ट खात्याकडून सेवा मिळणार असल्याने यावर्षी येऊन पोस्ट खात्यातून तिरंगा खरेदी करणाऱ्यांची संख्या कमी होईल. पोस्ट खात्याकडून विविध उपक्रमाबाबत जागृतीही केली जाणार आहे.