नवी दिल्ली : 'व्हॅलेंटाईन डे' दिनी १४ फेब्रुवारी रोजी 'काऊ हग डे' अर्थात गो अलिंगन दिन साजरा करण्याचं आवाहन केंद्र सरकारकडून देशवासियांना करण्यात आलं होतं. पण यावरुन मोठा वाद निर्माण झाल्यानंतर आता सरकारनं आपलं हे आवाहन मागं घेतलं आहे.

यासंदर्भात ८ फेब्रुवारी २०२३ रोजी केंद्रीय पशु कल्याण मंडळानं व्हॅलेंटाईन डे ऐवजी 14 फेब्रुवारीला 'काऊ हग डे' साजरा करण्याचं आवाहन जनतेला केलं होतं. 14 फेब्रुवारीला गायींना मिठी मारून त्यांच्याप्रती प्रेम व्यक्त करावं आणि व्हॅलेंटाईन डे ऐवजी 'काऊ हग डे' साजरा करावा, हे आवाहान होतं.

यासंदर्भात काढलेल्या परिपत्रकात म्हटलं होतं की, आपल्या सर्वांना माहित आहे गाय भारतीय संस्कृतीचा आधार आहे. पाश्चिमात्य संस्कृतीच्या झगमगाटापुढे आपण आपली संस्कृती आणि वारसा विसरलो आहोत. गायीला मिठी मारल्यानं भावनिक उन्नती होते. म्हणूनच गाईवर प्रेम करणाऱ्या लोकांनी १४ फेब्रुवारीला 'काऊ हग डे' साजरा करावा. तसेच हा दिवस साजरा करताना गायीला आपली माता समजा असं या परिपत्रकात म्हटलं होतं.

हे ही वाचा : संतुलित आहारातून रोखा फॅटी लिव्हरचा आजार

'काऊ हग डे'वरुन उद्भवला होता वाद

केंद्राचं हे आवाहन प्रत्यक्षात शक्य नसल्याचं सांगत. विविध स्तरातून यावरुन केंद्र सरकारला टार्गेट करण्यात आलं होतं. केंद्राकडून आपला धार्मिक अजेंटा विनाकारण रेटला जात असल्याचा आरोप नुकताच शिवसेनेनं केला होता. तसेच सोशल मीडियातून नेटकऱ्यांनी याची मोठी खिल्ली उडवली होती.