दिल्लीत २०२० मध्ये झालेल्या दंगलीत अनेकांचे प्राण गेले होते. यात इंटेलिजन्स ब्युरोचे कर्मचारी अंकित शर्मा यांची निर्घृण हत्या करण्यात आली होती. आता दिल्ली सरकारने त्यांचे भाऊ अंकुर शर्मा यांना शिक्षण विभागात नोकरी दिली आहे. मुख्यमंत्री अरविंद केजरीवाल यांनी आज त्यांच्या कुटुंबियांकडे सरकारी नोकरीचे पत्र सोपवले.

मुख्यमंत्री अरविंद केजरीवाल यांनी गेल्या वर्षी अंकित शर्मा यांच्या कुटुंबाला १ कोटी रुपयांचा धनादेश मदत निधी म्हणून दिला होता. दिल्ली सरकारने आता अंकित शर्मा यांचा भाऊ अंकुर शर्मा यांना शिक्षण विभागात नोकरी दिली आहे. मुख्यमंत्री केजरीवाल यांनी ट्विट करून याची माहिती दिली आहे. त्यांनी म्हटलं की, माणसाची जागा भरून काढता येणार नाही, मात्र सरकारी नोकरी आणि मदत निधीने कुटुंबाला बळ मिळेल.

राजधानी दिल्लीत फेब्रुवारी २०२० मध्ये दंगल उसळली होती. या दंगलीवेळी अंकित शर्मा यांची हत्या करण्यात आली होती. दिल्ली पोलिसांनी दाखल केलेल्या आरोपपत्रात त्यांच्या निर्घृण हत्येबद्दल सांगण्यात आलं होतं. या प्रकरणी आम आदमी पार्टीच्या ताहीर हुसैन यांच्यासह १० लोकांना अटकसुद्धा करण्यात आली होती. दिल्लीत झालेल्या या दंगलीत जवळपास ५३ जणांचा मृत्यू झाला होता तर ४०० हून अधिक लोक जखमी झाले होते.