नवी दिल्ली : राजधानी दिल्लीतील हिवाळ्यातील प्रदूषणावर मात करण्यासाठी केजरीवाल सरकारने फटाक्यांवर बंदीबरोबरच दहा कलमी कार्यक्रम आखला आहे. त्यानुसार कचरा जाळणे, धूळ आणि वाहनांच्या धुराची तपासणी जाणार आहे.

दिल्लीचे मुख्यमंत्री अरविंद केजरीवाल याबाबत म्हणाले की, पंधरा सप्टेंबरपासून आतापर्यंत दिल्लीतील प्रदूषणाची स्थिती बरी आहे. पण आता शेजारील राज्यांतील शेतकऱ्यांना शेतातील गवत आणि आधीच्या पिकांचे अवशेष जाळावे लागतील. त्यामुळे काही दिवसांत दिल्लीत प्रदूषण जाणवेल. त्यासाठी सरकारी यंत्रणेला हवा स्वच्छ करण्यासाठी सूचना केली आहे. धुळीचे प्रदूषण तपासण्यासाठी बांधकाम स्थळांची पाहणी करण्यासाठी ७५ गट आणि शहरातील प्रदूषण हॉटस्पॉटवर लक्ष ठेवण्यासाठी विशेष गटाची स्थापना केली आहे. वाहनांचे प्रदूषण कमी करण्यासाठी ६४ रस्त्यांवरील वाहतूक कोंडीची समस्या दूर करण्यासाठीही पावले उचलली जातील. वाहनांची तपासणी करण्यासाठी ५०० पथके तयार करून प्रदूषण नियंत्रण (पीयूसी) काटेकोरपणे पाळले जाईल. शहरातील कचरा जाळणे थांबवण्यासाठी एकूण २५० गट तयार करण्यात आले आहेत. तसेच, ग्रीन वॉर रूम मजबूत करणे आणि जनजागृती अभियान हिवाळी कृती योजनेचा भाग असेल," असे त्यांनी सांगितले.

स्मॉग टॉवरच्या परिणामांचा अभ्यास

दिल्लीप्रमाणे राष्ट्रीय राजधानी (एनसीआर) क्षेत्रांना सीएनजीवर चालणारी वाहने, थर्मल प्लांट्स आणि इतर उद्योगांमध्ये स्वच्छ इंधनाचा वापर, हॉटस्पॉट्सचे निरीक्षण आणि वापर थांबवण्यासाठी चोवीस तास वीज पुरवठा केला जाईल. आम्ही दिल्लीत श्रेणीबद्ध प्रतिसाद कृती योजना लागू केली आहे. परिस्थितीचा आढावा घेण्यासाठी आणि मार्गदर्शक तत्त्वांचे उल्लंघन करणाऱ्यांना शिक्षा करण्यासाठी आम्ही प्रदूषण विरोधी कारवाईचा भाग म्हणून ७५ गटांची स्थापना केली आहे. आम्ही दिल्लीच्या स्मॉग टॉवरच्या परिणामाचाही अभ्यास करत आहोत आणि परिणाम चांगले असतील तर आणखी टॉवर बसवले जातील, असे ते म्हणाले. दिल्लीमध्ये २० एकरांवर पसरलेले देशातील पहिले इको-वेस्ट पार्क देखील बांधत आहोत, असे त्यांनी स्पष्ट केले.