नवी दिल्ली : सध्या देशात मशिद आणि मंदिरावरून वाद सुरू आहेत. काशी, मथुरा येथील मशिदी या मंदिरे पाडून बांधल्या असल्याचा आरोप करण्यात येत आहे. दरम्यान ताजमहल हाही हिंदू मंदिर पाडून बनवला आहे असाही आरोप करण्यात आला. एमआयएमचे अध्यक्ष आणि हैदराबादचे खासदार असदुद्दीन ओवैसी यांनी यासंदर्भात टीका करत पंतप्रधान मोदींवर निशाणा साधला आहे.

(Asaduddin Owaisi On Narendra Modi And Tajmahal Controversy)

मुंबईत काल (शनिवारी) एमआयएमची सभा झाली, त्यावेळी ओवैसी बोलत होते. देशात चाललेल्या धार्मिक ध्रुवीकरणार बोट ठेवत त्यांनी भाजपाला आपल्या टीकेचा धनी बनवलं. मशिद आणि मंदिराच्या वादावर बोलताना, "ते ताजमहल खाली पंतप्रधान मोदींची डिग्री शोधत आहेत." असा टोमणा त्यांनी लावला आहे. काही आठवड्यांपूर्वी ताजमहलचा हा वाद समोर आला होता. ताजमहल मधील 'त्या' २२ बंद खोल्याचं राज काय आहे ते शोधण्याची मागणी केली जात होती.

भाजपाच्या एका नेत्याने ताजमहलच्या संदर्भातील याचिका कोर्टात दाखल केली होती. ताजमहल हे शिवमंदिर पाडून बांधले असल्याचा दावा या याचिकेत करण्यात आला आहे. त्यानंतर १२ मे रोजी कोर्टाने ही याचिका फेटाळून लावली होती. अशा गोष्टी इतिहासकारांवर सोडल्या पाहिजेत असं म्हणत कोर्टाने भाजप नेत्याची याचिका फेटाळून लावली होती. पुढे बोलताना ओवैसी म्हणाले की, "भाजपा सारखं जगातील विविध भागांतून मुघल भारतात कसे आणि कधी आले यावर बोलत असतो. केवळ द्रविड आणि आदिवासी हे भारतातील स्थानिक आहेत." असं ते म्हणाले.

"भारत ना माझा आहे, ना मोदी-शहांचा, ना ठाकरेंचा. भारत कोणाचा असेल तर द्रविड आदिवासींचा आहे. पण प्रत्यक्षात आफ्रिका, इराण, मध्य आशिया, पूर्व आशियामधील लोकांनी भारतात स्थलांतर केल्यावर भारताची निर्मिती झाली." असा दावा त्यांनी यावेळी बोलताना म्हणाले आहेत.