मुघल शासक (Mughal Ruler) औरंगजेब (Aurangzeb) धर्मांधतेसाठी ओळखला जातो, परंतु आसाममधील (Assam) ऑल इंडिया युनायटेड डेमोक्रॅटिक फ्रंटच्या आमदाराचा एक वेगळाच दावा आहे. इतिहासापेक्षा वेगळा दावा करत आमदार अमीनुल इस्लाम (MLA Aminul Islam) यांनी सांगितलं, की औरंगजेबानं 400 मंदिरांसाठी जमीन दान केली होती. या मंदिरांपैकी एक म्हणजे, गुवाहाटीचं प्रसिद्ध कामाख्या देवी मंदिर (Kamakhya Temple) आहे. मंगळवारी ANI शी बोलताना अमीनुल इस्लाम म्हणाले, मुघल राजवटीत देशानं जे पाहिलं, ते एका इतिहासकारानं आपल्या पुस्तकात नमूद केलंय. औरंगजेबानं त्याकाळात 400 हून अधिक मंदिरांसाठी जमीन दान केली होती, असा दावाही त्यांनी केलाय.

AIUDF चे आमदार इस्लाम पुढे म्हणाले, इतर मुघल शासकांनीही मंदिरं आणि पुजाऱ्यांसाठी जमिनी दान केल्या होत्या. यातील एक कामाख्या मंदिर आहे. हजारो वर्षांपासून धर्मनिरपेक्षतेची भावना देशात आहे. 1947 पासून ते सुरू झालेलं नाही. आसामचे मुख्यमंत्री म्हणाले होते, भारत 1947 पासून धर्मनिरपेक्ष आहे. याला प्रत्युत्तर देताना इस्लाम म्हणाले, ज्यांनी भारतावर राज्य केलं त्यांनी धर्मनिरपेक्षता पाळली. मात्र, हिंदू राज्यकर्त्यांच्या काळात मुस्लिम वर्गातील लोक त्यांच्या श्रद्धेसाठी मोकळे होते आणि तशीच परिस्थिती मुस्लिम राज्यकर्त्यांच्या काळातही होती, असं त्यांचं म्हणणं आहे.

'पवित्र आसाम' या पुस्तकात म्हंटलंय, की औरंगजेबच्या दरबारातील एका अधिकाऱ्यानं जमिनी दान करण्याचे आदेश दिले होते. त्यांच्या दाव्यावर आक्षेप घेत मुख्यमंत्र्यांनी मला धमकावण्याऐवजी हे पुस्तक प्रकाशित करणाऱ्या आसाम साहित्य सभेला धमकावलं पाहिजे, असंही इस्लाम म्हणाले. हजारो राज्यकर्त्यांच्या काळात धर्मनिरपेक्षता आली आहे, त्यामुळं स्वातंत्र्यानंतरच देशात धर्मनिरपेक्षता आली, असं म्हणणं पूर्णपणे चुकीचं असल्याचंही त्यांनी सांगितलंय.