Assam Guwahati News: आसामचे मुख्यमंत्री हेमंत बिस्व शर्मा यांनी मोठी घोषणा केली आहे. राज्यात जन्म झालेल्या लोकांनाच सरकारी नोकरी मिळेल अशी घोषणा त्यांनी केली आहे. ज्यांचा जन्म आसामामध्ये झालाय त्यांनाच सरकारी नोकरी मिळेल अशी तरतूद करण्यात येईल असं ते म्हणाले आहेत. 'द हिंदू'ने यासंदर्भातील वृत्त दिलं आहे.

शर्मा यांनी आणखी एक मोठी घोषणा केली आहे. यापुढे हिंदू आणि मुस्लिमांमध्ये जमीनीचे हस्तांतरण करण्यासाठी थेट मुख्यमंत्र्यांची मंजुरी बंधनकारक करण्यात आली आहे. मंत्रिमंडळाच्या बैठकीत त्यांनी यासंदर्भातील माहिती दिली आहे. निवडणुकीपूर्वी दिलेले सर्व आश्वासने आम्ही पूर्ण करणार आहोत. स्थानिक लोकांसाठी १ लाख सरकारी नोकऱ्या देण्यात येतील असंही ते म्हणाले.

हिंदू आणि मुस्लिमांमध्ये जमिनीचा व्यवहार आपण रोखू शकत नाही, पण यापुढे मुस्लीम किंवा हिंदूंना जमिनीचे देवाण-घेवाण करायची असेल तर मुख्यमंत्र्यांची मंजुरी घ्यावी लागेल. याआधी राज्य सरकारने दोन धर्मातील व्यक्तींच्या जमीन व्यवहाराला नो-ऑबजेक्शन सर्टिफिकेट देण्याचे तीन महिन्यांसाठी टाळले होते. सरकारचा हा निर्णय वादाचा ठरण्याची शक्यता आहे.

लव्ह जिहादसाठी कठोर कायदा

हेमंत बिस्व शर्मा यांनी कथित लव्ह जिहाद संदर्भात देखील नव्या तरतुदीची घोषणा केली आहे. यापुढे लव्ह जिहाद प्रकरणातील आरोपीला जन्मठेपेची शिक्षा सुनावण्यात येणार आहेत. अशाच प्रकारचे विधेयक उत्तर प्रदेशच्या विधानसभेमध्ये मंजूर करण्यात आले आहे. लव्ह जिहाद ही टर्म उजव्या विचारसरणीच्या लोकांनी वापरली आहे. यात मुस्लीम व्यक्तीसोबत प्रेम किंवा लग्न याचा समावेश होतो.

शर्मा यांनी राज्यातील वाढत्या लोकसंख्येबाबत चिंता व्यक्त केली आहे. बांगलादेशमधून अनेक मुस्लीम आसाममध्ये आले आहेत. ते स्वत:ला स्थानिक लोक म्हणत आहेत, असा दावा शर्मा यांनी केलाय. यासंदर्भात कठोर नियम करणार असल्याचं ते म्हणाले आहेत.