आसाममध्ये संततधार पावसामुळे पूरस्थिती गंभीर बनली आहे. गेल्या 24 तासांत आठ जणांचा मृत्यू झाल्याची माहिती आहे. 31 लाखांहून अधिक लोकांना पुराचा फटका बसला आहे. अधिकाऱ्यांनी गुरुवारी सांगितले की, काछारच्या सिलचर क्षेत्राचा मोठा भाग गेल्या 11 दिवसांपासून पाण्याखाली आहे. यावर्षी पूर आणि भूस्खलनामुळे 159 जणांचा मृत्यू झाला आहे. (assam flood 8 more deaths over 31 lakh people affected heavy rain)

आसाममधील 26 जिल्ह्यांतील पूरग्रस्तांची संख्या 31.54 लाखांवर पोहोचली आहे. एक दिवसापूर्वी पूरग्रस्तांची संख्या 24.92 लाख होती. ब्रह्मपुत्रा, बेकी, कोपिली आणि कुशियारा नद्या धोक्याच्या पातळीवरून वाहत आहेत. मात्र, इतर अनेक नद्यांची पाणीपातळी कमी होत आहे. मुख्यमंत्री हिमंता बिस्वा सरमा यांनी उपायुक्तांसोबत व्हर्चुअल बैठक घेतली आणि पूरग्रस्तांना मदत देण्याचे निर्देश दिले आहेत.

गेल्या काही दिवसांपासून सुरू असलेल्या संततधार पावसामुळे ईशान्येकडील राज्य प्रभावित झाले आहे, त्यामुळे पूर आणि भूस्खलन झाले आहे, त्यामुळे संपर्क तुटला आहे आणि लोक प्रभावित झाले आहेत.

मणिपूर: भूस्खलन होऊन 13 जणांचा मृत्यू झाला

मणिपूरच्या नोनी जिल्ह्यात रेल्वेच्या बांधकामाच्या ठिकाणी भूस्खलन होऊन 13 जणांचा मृत्यू झाला. तसेच स्थानिक लोकांसह लष्कराचे सुमारे 50 लोक बेपत्ता असल्याची माहिती मिळाली आहे. अधिकाऱ्यांनी सांगितले की, बुधवारी रात्री तुपुल यार्ड रेल्वे बांधकामाच्या ठिकाणी ही घटना घडली. बचावकार्य सुरू असून मुख्यमंत्री एन बिरेन सिंग यांनी ट्विट केले की तुपुलमधील भूस्खलनाच्या घटनेचे मूल्यांकन करण्यासाठी तातडीची बैठक बोलावण्यात आली आहे. शोध आणि बचाव कार्य सुरू आहे. बचाव कार्यात मदत करण्यासाठी डॉक्टरांसह एक रुग्णवाहिकाही पाठवण्यात आली आहे.