गुवाहाटी - आसाममध्‍ये कोरोनाचे संकट वाढत असताना वर्दीतील डॉक्टर जागा झाला आणि त्याने अनेक रुग्णांवर उपचार करीत बरे केले. डॉक्टरच्या रूपात धावून आलेल्या या भारतीय पोलिस सेवेतील (आयपीएस) अधिकाऱ्याने आसाममधील नागरिकांची मने जिंकली आहेत. या अधिकाऱ्याचे नाव रॉबिन कुमार असे असून ते बारपेटा येथे पोलिस अधीक्षकपदी कार्यरत आहेत.

कुमार हे १९९३ च्या तुकडीतील आयपीएस अधिकारी आहेत. त्यांनी एम.बी.बी.एसचे शिक्षण घेतलेले असून औषधशास्त्र या विषयात एम.डी पदवी मिळविलेली आहे. या वैद्यकीय ज्ञानाचा वापर करण्याची संधी त्यांना सध्याच्या कोरोना काळात मिळाली. कोरोनाच्या वाढत्या रुग्णसंख्येमुळे आरोग्य व्यवस्थेवर ताण आलेला असताना रॉबिन कुमार हे रुग्णांच्या हाकेला धावून जात असून त्यांच्यावर उपचारही करीत आहेत. पोलिस अधिकारी आणि डॉक्टर अशा दुहेरी पातळीवर लोकसेवा करीत असल्याने कुमार यांचे सर्वत्र कौतुक होत आहेत.

हे वाचा - दिलासादायक! देशात कोरोना रिकव्हरी रेटचा उच्चांक

जिल्हा पोलिसाची जबाबदारी पेलत असताना रॉबिन कुमार हे पोलिस व त्यांच्या कुटुंबांसाठी राखीव असलेल्या बारपेटा पोलिस राखीव दलातील ५० खाटांचे कोरोना उपचार केंद्र आणि चार खाटांची आयसीयू केंद्राची जबाबदारीही सांभाळात आहेत. महिला व ज्येष्ठांसाठी आरोग्य शिबिराचे आयोजनही करण्याचा त्यांचा विचार आहे. रॉबिन कुमार हे मूळचे उत्तर प्रदेशमधील गाझियाबादचे आहेत. आसाम पोलिस दलात प्रवेश केल्यानंतर त्यांनी तेजपूर येथे आरोग्य शिबाराचे आयोजन केले होते.

आसाममधील पोलिस योद्ध्याने विश्‍वास जिंकली आहे. बारपेटातील पोलिस अधीक्षक रॉबिन कुमार यांनी त्यांचे वैद्यकीय शिक्षणाचा उपयोग करीत कोरोनाविरोधातील लढ्यात डॉक्टर आणि आरोग्य कर्मचाऱ्यांना मदत केली आहे. यातून मानवेतेच्या सेवेचा आदर्श त्यांनी घालून दिला आहे.
सर्वानंद सोनोवाल, मुख्यमंत्री, आसाम

‘‘कोरोनाव्हायरसचा प्रसार होण्यास सुरुवात झाल्यानंतर मी आसामचे पोलिस महासंचालक भास्कर जोशी महंत यांना बारपेटातील पोलिस कर्मचाऱ्यांसाठी कोरोनो उपचार केंद्र उभारण्याची परवानगी मागितली होती. आता हे केंद्र व्यवस्थित सुरू झाले आहेत.जिल्हा पोलिस प्रमुख व डॉक्टर अशा दोन्ही भूमिका निभावू शकतो हे माझे भाग्यच आहे. यामुळे मला मोठे समाधान मिळत आहे, ’’ असे रॉबिन कुमार म्हणाले.