Atiq Ahmad Murder : गुंड-राजकारणी बनलेला अतिक अहमद आणि त्याचा भाऊ अशरफ यांची हत्या करणाऱ्या तीन शूटर्सची पार्श्वभूमी काय? हत्येमागं नेमकं कारण काय? गुन्हेगारांना काय हवं होतं? असे अनेक प्रश्न जनतेच्या मनात आहेत. हे तिन्ही शूटर्स कोण आहेत आणि त्यांना काय हवं होतं, हे प्रत्येकाला जाणून घ्यायचं आहे.

याप्रकरणी आता मोठा खुलासा झाला आहे. ताज्या माहितीनुसार, नाव आणि प्रसिद्धी मिळवण्यासाठी या शूटर्सनी ही घटना घडवली. प्राथमिक तपासात याची पुष्टी झाली आहे. म्हणजेच, आतापर्यंतच्या पोलीस तपासात या प्रकरणाशी कोणताही राजकीय संबंध आढळून आलेला नाही. तसंच यात कोणत्याही टोळीचा किंवा माफियाचा हात नाही. आरोपींनी केवळ प्रसिद्धीसाठी एवढी मोठी घटना घडवली.

प्रयागराज पोलिसांच्या म्हणण्यानुसार, अतीक अहमद आणि त्याचा भाऊ अशरफ यांना ठार मारुन आम्हाला लोकप्रिय व्हायचं होतं, असं हत्येमध्ये सहभागी असलेल्या तीन शूटर्सनी चौकशीदरम्यान पोलिसांना सांगितलं. प्रयागराजचे पोलीस आयुक्त रमित शर्मा यांनी सांगितलं की, अतीक अहमद, त्याचा भाऊ अशरफ अहमद यांना वैद्यकीय उपचारासाठी आणलं होतं. मात्र, तीन लोक तिथं आले आणि त्यांनी त्यांच्यावर गोळीबार केला. तिथं जागीच दोघांचा मृत्यू झाला. तीन जणांना अटक करण्यात आली आहे. त्यांची चौकशी केली जात आहे.

बांदा येथील रहिवासी लवलेश तिवारी, हमीरपूरचा रहिवासी सनी सिंह आणि कासगंजचा रहिवासी अरुण मौर्य अशी तीन आरोपींची नावं आहेत. तिघंही पोलिस कोठडीत आहेत. प्राथमिक तपासात त्यांनी केवळ प्रसिद्धीसाठी हे कृत्य केल्याची कबुली दिली आहे.