नवी दिल्ली : काँग्रेसचे माजी अध्यक्ष राहुल गांधी यांनी सरकारी बँक कर्मचाऱ्यांच्या संपावरुन केंद्र सरकारवर निशाणा साधला आहे. तसेच त्यांनी या संप करणाऱ्या कर्मचाऱ्यांना आपला पाठिंबा जाहीर केला आहे. राहुल गांधींनी ट्विट करत असा दावा देखील केलाय की, सरकार लाभाचे खासगीकरण आणि नुकसानीचे राष्ट्रीयकरण करत आहे. राहुल गांधींनी ट्विट केलंय की, केंद्र सरकार लाभाचे खासगीकरण आणि नुकसानीचे राष्ट्रीयकरण करत आहे. सार्वजनिक क्षेत्रातील बँकांना कॉर्पोरेट्सना विकणं म्हणजे भारताच्या आर्थिक सुरक्षेसोबत तडजोड करण्यासारखं आहे. 

सध्या दोन सरकारी बँकाच्या खासगीकरणाविरोधात बँकेचे कर्मचारी संपावर आहेत. त्यामुळे सध्या बँकेचे कामकाज ठप्प झाले आहे. युनायटेड फोरम ऑफ बँक युनियन्सने 15 आणि 16 मार्च रोजी संपाचं आवाहन केलं आहे. या युनियनने दावा केलाय की जवळपास 10 लाख बँक कर्मचारी तसेच अधिकारी या संपामध्ये सामील झाले आहेत. राज्यसभेत देखील या मुद्यावर चर्चा झाली. राज्यसभेतील विरोधी पक्षनेते मल्लिकार्जून खरगे यांनी या मुद्यावरुन प्रश्न विचारले आहेत. तसेच यावर उपाय काढण्यासाठी केंद्रीय अर्थमंत्री निर्मला सीतारमण यांना उत्तर देण्याची मागणी केली. 

हेही वाचा - 'ममता खोटारड्या, त्यांचं नामांकन रद्द व्हावं'; प्रतिज्ञापत्रावरुन सुवेंदु अधिकारींचा आरोप

त्यांनी म्हटलं की, देशात जवळपास 12 राष्ट्रीयकृत बँक आहेत तसेच यांच्या एक लाखभर शाखा आहेत. यामध्ये जवळपास 13 लाख लोक काम करत आहेत आणि 75 कोटीहून अधिक खातेदार आहेत. यातील कुणालाही न विचारता सरकारने खासगीकरणाचा निर्णय घेतला आहे. 2008 मध्ये जेंव्हा जागतिक अर्थव्यवस्थेवर संकट आलेलं तेंव्हा राष्ट्रीयकृत बँकांमुळेच अर्थव्यवस्था तगली होती. आज बँकेचे लाखो कर्मचारी रस्त्यावर आहेत तर त्यांच्या समस्येला अर्थमंत्र्यांनी वाचा फोडायला हवी.