बेळगाव : महाराष्ट्र एकीकरण समिती (Maharashtra Ekikaran Samiti Belgaum) आणि मराठी भाषिकांतर्फे बेळगावला आज (ता. १) आयोजित काळा दिन फेरीत सहभागी होण्यासाठी येणाऱ्या शिवसेना नेते विजय देवणे आणि कार्यकर्ते यांना महाराष्ट्र-कर्नाटक सीमेवर कोगनोळी टोल नाक्याजवळ रोखण्यात आले.

यावेळी पोलीस व शिवसेना पदाधिकारी यांच्यामध्ये बाचाबाची झाली. पोलिसांनी रोखून धरल्याच्या निषेधार्थ ठिय्या आंदोलन करण्यात आले. बेळगावसह सीमाभागामध्ये मराठी भाषेवर अन्याय झाल्यानंतर त्याची ठिणगी शेजारी महाराष्ट्र राज्यात उमटते. खासकरून कोल्हापूर येथे या विरोधात निदर्शने केली जातात.

आज काळादिन फेरीत सहभागी होण्यासाठी हजारो कार्यकर्ते येण्याची शक्यता होती. त्यासाठी कर्नाटक पोलिसांनी (Karnataka Police) चेक पोस्ट उभारले आहेत. कोगनोळी टोलनाकामार्गे (Kognoli Toll Plaza) आत येताना पोलिसांनी अडविले आणि ताब्यात घेऊन महाराष्ट्र पोलिसांकडे सुपूर्द केले आहे.

यावेळी कर्नाटक राज्यामध्ये जाऊ दिले जात नसल्याच्या निषेधार्थ शिवसेनेच्या पदाधिकाऱ्यांनी महामार्गावरच ठिय्या आंदोलन सुरू केले. यामुळे या ठिकाणी काहीकाळ तणावपूर्ण वातावरण बनले होते. यावेळी 'रहेंगे तो महाराष्ट्र मे, नही तो जेल मे,' बेळगाव, कारवार, निपाणी, बिदर भालकीचा संयुक्त महाराज झालाच पाहिजे, कर्नाटक मुख्यमंत्र्यांचा निषेध स्वरूपाच्या घोषणा, या संदर्भात देऊन लक्ष वेधून घेतले.

शिवसेना कार्यकर्ते आंदोलनात सहभागी झाले होते. दरम्यान, महाराष्ट्रातून मोठ्या प्रमाणात कार्यकर्ते येण्याची शक्यता असल्यामुळे कर्नाटक पोलिसांनी १४ चेक पोस्ट उभारले असून त्या ठिकाणी पोलिसांचा मोठा बंदोबस्त ठेवण्यात आला आहे, त्याचाच भाग म्हणून पोलिसांनी यादरम्यान कारवाई करून कार्यकर्त्यांना रोखून धरले.