मोहाली : आम आदमी पक्षाचे समन्वयक अरविंद केजरीवाल (Arvind Kejriwal) यांनी पक्षाचे खासदार भगवंतसिंग मान (Bhagwant Mann) यांची पंजाबच्या मुख्यमंत्रीपदाचा (Punjab CM) उमेदवार म्हणून भगवंत मान यांची मंगळवारी घोषणा केली. यावर मान यांनी पहिल्यांदा प्रतिक्रिया देताना आपनं (AAP) माझ्या खांद्यावर मोठी जबाबदारी सोपवली आहे. त्यामुळं सर्वात आधी आता पंजाबमध्ये आपचं सरकार स्थापन करण्यासाठी प्रयत्न करणार असल्याचं त्यांनी म्हटलं आहे. (Bhagwant Mann first reaction after being announced for post of Punjab CM)

मान म्हणाले, अडचणीवर मात कशी करायची हे पंजाबच्या जनतेला माहिती आहे. त्यामुळं आशा सोडू नका. आपनं माझ्या खांद्यावर मोठी जबाबदारी टाकली असून आधी पंजाबमध्ये आपचं सरकार स्थापन करण्यासाठी आपण प्रयत्न करणार आहोत. यावेळी आपल्या पंजाबी भाषेत त्यांनी काही काव्यात्मक पंक्तीही म्हटल्या.

आपकडून गेल्या आठवड्यात एक फोन क्रमांक शेअर केला होता. तसेच पंजाबच्या लोकांना आवाहन केलं होतं की, मुख्यमंत्रीपदासाठी तुम्हाला जो उमेदवार योग्य वाटतो त्याला वोट करा. ज्याला सर्वात जास्त मतं मिळतील तो मुख्यमंत्रीपदाचा उमेदवार असेल. यानंतर जनतेनेही याला उत्स्फुर्त प्रतिसाद दिला, त्यामुळं यासाठी २२ लाख लोकांनी फोनवरुन प्रतिसाद दिला.

केजरीवाल यांच्यामाहितीनुसार, ९३.३ टक्के लोकांनी भगवंत मान यांच्या नावाला पसंती दिली. त्यामुळं अखेर मान यांच्या नावावर मुख्यमंत्रीपदासाठी शिक्कामोर्तब झालं. मान हे सध्या संग्रूर लोकसभा मतदारसंघातून आपचं प्रतिनिधीत्व करत आहेत.