पाटणा : बिहारचे मुख्यमंत्री नितीश कुमार हे पुन्हा एकदा विरोधकांची इंडिया आघाडी सोडून भाजपसोबत गेले आहेत. यापार्श्वभूमीवर त्यांच्यानावे धमकीचा मेसेज आला आहे. यात भाजपपासून वेगळं व्हा अन्यथा तुम्हाला बॉम्बनं उडवून देऊ, असं म्हटलं आहे.

बिहारचे पोलीस महासंचालकांना हा मेसेज आला आहे. हा मेसेज करणाऱ्याला पोलिसांनी अटक केली आहे. (bihar cm nitish kumar threat message separate from BJP or we will bomb it)

नेमकं मेसेजमध्ये काय म्हटलंय?

30 जानेवारी रोजी बिहारचे पोलीस महासंचालक आरएस भट्टी यांच्या व्हॉट्सअॅपवर मेसेज आणि ऑडिओ क्लीप आली होती. या मेसेजमध्ये म्हटलं की, "जर मुख्यमंत्री नितीश कुमार भाजपपासून वेगळे झाले नाहीत तर इतर आमदारांसोबत त्यांना बॉम्बनं उडवून देऊ, जस उत्तर प्रदेशात झालं होतं" या धमकीची दखल राज्याच्या आर्थिक घोटाळा विभागानं घेतली आहे.

या धमकीनंतर बिहारच्या आर्थिक घोटाळा विभागानं कर्नाटकात छापेमारी केली आणि धमकी देणाऱ्या आरोपीला अटक केली. त्याच्याकडं चौकशी सुरु आहे. त्यानंतर आरोपील ताब्यात घेऊन पोलीस काल रात्री उशीरा पाटण्यात दाखल झाले. (Latest Marathi News)

पोलीस महासंचालकांना ज्या फोन क्रमांकावरुन मेसेज आला त्याची चौकशी केली असता त्याचं लोकेशन कर्नाटकातील देवनगिरी जिल्ह्यात असल्याचं कळालं. त्यानंतर पोलिसांची टीम तिथं पोहोचली आणि त्यांनी आरोपीला ताब्यात घेतलं. आरोपाचं नाव सोनू असून तो बीएनएम हायटेक अॅग्रो इंडस्ट्रीज राइस मिलमध्ये पोती शिवायचं काम करतो.

दरम्यान, चौकशीमध्ये त्यानं सांगितलं की, बिहारमधील वाढती बेरोजगारी आणि गरिबीला तिथलं सरकारचं कारणीभूत आहे. त्याचं कुटुंब बिहारच्या हसनपूर इथल्या दयानगरमध्ये राहतं. सोनूनं पुढे सांगितलं की, धमकीच्या इतक्या क्लीप पाठवल्यानंतरही बिहारमध्ये कोणतीही हालचाल दिसून येत नसल्यानं आपलं या क्लीप्स माध्यमांना देणार होते. पण त्यापूर्वी त्याला ताब्यात घेण्यात आलं.