पाटणा (बिहार) : पाटणामध्ये (Patna) पोलीस पथकावर मोठा हल्ला झाला असून पोलीस आणि गावकऱ्यांमध्ये झालेल्या चकमकीदरम्यान गोळीबारात एकाचा मृत्यू झालाय, तर एका निरीक्षकासह 23 पोलीस जखमी (Bihar Police) झाल्याचे समजते. मिळालेल्या माहितीनुसार, पोलीस निवडणूक प्रचार थांबवण्यासाठी गेले होते, असंही सांगण्यात येतंय.

शुक्रवारी रात्री पाटणाच्या धनरुआमध्ये ग्रामस्थ आणि पोलिसांमध्ये जोरदार चकमक झाली. यावेळी बचावासाठी पोलिसांनी गोळीबार केला. यात एका तरुणाचा मृत्यू झाला, तर तिघेजण जखमी झाले आहेत. दरम्यान, गावकऱ्यांनी केलेल्या हल्ल्यात जवळपास 23 पोलीस जखमी झाले असून परिमंडळ निरीक्षक व धनरुआ ठाण्याचे पोलीस गंभीर जखमी झाले आहेत. यात काही पोलिसांची प्रकृती चिंताजनक असल्याचे सांगण्यात येतंय. अहवालानुसार, पोलिसांनी त्यांच्या बचावासाठी सुमारे 30-40 राऊंड गोळीबार केला.

स्थानिक मीडिया रिपोर्ट्सनुसार, ही घटना धनरुआच्या मोरियावा गावातील आहे. या गावात उमेदवार प्रचाराची वेळ (पाच वाजता) संपल्यानंतरही परिसरात प्रचार करत होता. याची खबर धनरुआ पोलीस ठाण्याला लागताच, ते प्रचार थांबवण्यासाठी तिथं पोहोचले. त्यावेळी पोलीस पथकाची संख्या खूपच कमी होती. दरम्यान, प्रमुख उमेदवार आणि त्यांच्या मुलानं त्यांच्या समर्थकांना भडकावत पोलीस पथकावर हल्ला चढवला. त्यावेळी स्वत: चा जीव वाचवून पोलिसांचे पथक पुन्हा पोलिस ठाण्यात परतले. या घटनेची संपूर्ण माहिती पोलीस पथकानं वरिष्ठ अधिकाऱ्यांना दिली, त्यानंतर अधिकारी पोलिस फौजफाट्यासह घटनास्थळी पोहोचले. पोलिसांचा फौजफाटा पाहून ग्रामस्थ संतापले. यावेळी गोळीबारही करण्यात आला.