हैदराबाद : जेव्हा एखादा हुकूमशाह मुख्यमंत्री किंवा पंतप्रधान होतो तेव्हा देशात आणीबाणीसारखी परिस्थिती निर्माण होते. त्यासाठी आपल्याला लढत राहावे लागेल. इंदिरा गांधींसारख्या (Indira Gandhi) हुकुमशहाला समुद्रात फेकलं होतं. आता इथं समुद्र तयार आहे आणि कोणाला समुद्रात फेकायचं आहे ते तेलंगणावासियांना माहिती आहे, असं वक्तव्य आसामचे मुख्यमंत्री आणि भाजपचे नेते एच. बी. शर्मा यांनी केले.

तेलंगणामधील वारंगल येथे भाजपच्यावतीने एक कार्यक्रम आयोजित करण्यात आला होता. त्यामध्ये त्यांनी पक्षाच्या कार्यकर्त्यांना संबोधित केलं. आपल्याला अन्यायाविरोधात लढायचं आहे. काहीही झाले तरी अन्यायासोबत तडजोड करायची नाही. आपले कार्यकर्ते आता तयार आहेत. त्यासाठी तुम्हाला कष्ट घ्यावे लागतील. पण, कष्टाचं फळ नेहमी गोड असते. ज्यावेळी ते आपल्यावर हल्ला करतील त्यावेळी नवीन तेलंगणाची निर्मिती होईल. त्यामुळे तुम्हाला सर्वांना लढायचे आहे, असं आवाहन त्यांनी कार्यकर्त्यांना केलं.

भारतवासियांनी इंदिरा गांधींसारख्या हुकूमशहाला समुद्रात फेकलं होतं. आता समुद्र तयार आहे आणि त्यात कोणाला फेकायचं आहे? हे तेलंगणातील जनतेला चांगल्या प्रकारे माहिती आहे. भारतात कधीच हुकूमशाही चालली नाही. भारतानं हुकूमशाहीला विरोध केला होता. भविष्यात देखील हुकूमशाही चालणार नाही? अशी टीकाही त्यांनी काँग्रेसवर केली.

हुकूमशाह नेमकं कोणाला म्हटलं? -

पंतप्रधान मोदी हुकूमशाह आहेत, अशी टीका विरोधकांकडून नेहमीच केली जाते. पण, मोदी हुकूमशाह नसून ते जनतेच्या हिताचे निर्णय घेतात, असं केंद्रीय गृहमंत्री अमित शाह यांनी सांगितलं होतं. त्यानंतर आता भाजपच्या मुख्यमंत्र्यांकडून इंदिरा गांधींचा हुकूमशाह म्हणून उल्लेख करण्यात आला. पण, आता समुद्रात कोणाला फेकायचं? हे तेलंगणावासियांना चांगलं माहितीये, असंही मुख्यमंत्री म्हणाले. हा टोला त्यांनी नेमका कोणाला लगावला? याबाबत चर्चा रंगली आहे.