भारतीय जनता पक्षानं (BJP) गुजरात विधानसभा निवडणुकीसाठी (Gujarat Assembly Election) आपला जाहीरनामा प्रसिद्ध केला आहे. या जाहीरनाम्यात भाजपनं मतदारांना डोळ्यासमोर ठेवून 20 लाख तरुणांना रोजगार, 2 एम्स स्तरावरील संस्थांची स्थापना आणि 10 लाखांचा आरोग्य विमा यासह अनेक मोठी आश्वासनं दिली आहेत.

भाजपचे राष्ट्रीय अध्यक्ष जेपी नड्डा (JP Nadda) यांनी आज (शनिवार) गांधीनगर येथील प्रदेश कार्यालयात हे ठराव पत्र जारी केलं. जेपी नड्डा म्हणाले, 'गुजरात ही संतांची भूमी आहे. भाजप सरकार जे सांगतं तेच करतं. आम्ही संविधानाचं (Constitution) पालन करत असतो. आमच्या या संकल्प पत्रानं गुजरातचा नक्की विकास होईल.'

मोदीजी म्हणतात, संविधान हा आपला सर्वात मोठा धर्म आहे, त्याचं पालन करणं आणि ते सुरक्षित ठेवणं ही आपल्या सर्वांची जबाबदारी आहे. सुजलाम सुफलाम योजनेंतर्गत 'सिंचन योजना' पुढं नेण्यासाठी आम्ही 25 हजार कोटी रुपये खर्च करणार आहोत. यासह आम्ही दक्षिण गुजरात आणि सौराष्ट्रमध्ये 2 सी फूड पार्क उभारणार आहोत, असंही नड्डांनी जाहीर केलं.

भाजपच्या जाहीरनाम्यात मोठी आश्वासनं

भाजपच्या संकल्प पत्रानुसार, आयुष्मान भारत योजनेंतर्गत 5 लाखांपर्यंतचा आरोग्य विमा आता 10 लाख करण्यात येणार आहे. पुढील 5 वर्षात गुजरातमधील तरुणांना 20 लाख रोजगाराच्या संधी उपलब्ध करून देण्यात येणार आहेत. तसंच 10,000 कोटी रुपयांच्या बजेटमध्ये 20,000 सरकारी शाळांचं रूपांतर उत्कृष्ट शाळांमध्ये केलं जाईल. 3 सिव्हिल मेडिसिटी, 2 AIIMS स्तरावरील संस्था, विद्यमान रुग्णालये, CHC आणि PHC च्या पायाभूत सुविधांमध्ये सुधारणा करण्यासाठी 10,000 कोटी रुपयांचा महाराजा श्री भागवत सिंह स्वास्थ्य कोष तयार केला जाणार आहे.