बंगळूर : भाजपच्या रेट कार्ड बदनामीप्रकरणी (BJP Rate Card Case) मुख्यमंत्री सिद्धरामय्या (Siddaramaiah) आणि उपमुख्यमंत्री डी. के. शिवकुमार (D. K. Shivakumar), प्रदेश काँग्रेसचे प्रभारी रणदीपसिंह सुरजेवाला यांच्यासह ३६ नेत्यांना न्यायालयीन समन्स बजावले आहेत.

बंगळूर येथील लोकप्रतिनिधी न्यायालयाने (Bangalore Court) समन्स जारी केले असून मुख्यमंत्री सिद्धरामय्या आणि शिवकुमार यांना २८ जुलै रोजी प्रत्यक्ष हजर राहण्याचे निर्देश दिले आहेत. यापूर्वी भाजप सरकारच्या विरोधात आंदोलनादरम्यान नियमांचे उल्लंघन केल्याप्रकरणी पोलिसांनी काँग्रेस नेत्यांवर गुन्हा दाखल केला होता.

आता लोकप्रतिनिधींच्या विशेष न्यायालयाने हे प्रकरण सुनावणीस योग्य असल्याचे मत व्यक्त केले आहे. काँग्रेस नेत्यांवर दाखल केलेल्या मानहानीच्या खटल्याची सुनावणी २७ जुलैपर्यंत पुढे ढकलली आहे. भाजपच्या वतीने वकील विनोद कुमार यांनी याचिका दाखल केली. न्यायमूर्ती जे. पीत यांच्या खंडपीठाने खटल्याला परवानगी दिली.

कंत्राटदार संतोष पाटील यांच्या मृत्यूप्रकरणी मंत्री के. एस. ईश्वरप्पा यांची मंत्रिमंडळातून हकालपट्टी करण्याची मागणी करत काँग्रेस नेत्यांनी मुख्यमंत्री बसवराज बोम्मई यांच्या निवासस्थानासमोर निदर्शने केली. या पार्श्वभूमीवर ३६ काँग्रेस नेत्यांवर गुन्हा दाखल केला आहे. बंगळूरमधील हाय ग्राउंड्स पोलिस स्टेशनमध्ये काँग्रेस नेत्यांविरुद्ध गुन्हा दाखल केला आहे. भाजपतर्फे विवेक सुब्बारेड्डी यांनी युक्तिवाद केला.