Mayavati supports UCC: समान नागरी संहितेवर अनेक पक्षांच्या भूमिका समोर येत आहेत. अशातच बहुजन समाज पार्टीच्या प्रमुख मायावती यांनी आपली भूमिका स्पष्ट केली आहे. त्या म्हणाल्या की त्यांचा पक्ष समान नागरी संहितेला विरोध करत नाही.

आम आदमी पक्ष आणि सुहेलदेव भारतीय समाज पार्टीनंतर बहुजन समाज पार्टीने देखील आपले स्पष्ट मत व्यक्त केले आहे. पक्षाच्या प्रमुख मायावती यांनी एक विधान केले ज्यात त्या म्हणाल्या की, त्यांचा पक्ष समान नागरी संहितेच्या विरोधात नाही. मात्र, भारतीय संविधान समान नागरी संहिता नागरिकांवर थोपण्याचे समर्थन करत नाही.

त्यानंतर मायावती म्हणाल्या की, समान नागरी संहितेशी निगडीत सर्व बाबींवर विचार केला पाहिजे. आमचा पक्ष समान नागरी संहितेच्या विरोधात नाही, पण यूसीसी लागू करण्याच्या भारतीय जनता पक्षाच्या पद्धतीशी आम्ही असहमत आहोत. भारतीय जनता पक्ष समान नागरी संहितेच्या माध्यमातून राजकारण करण्याचा प्रयत्न करत आहे, असेही त्या म्हणाल्या. (Letest Marathi News)

बहुजन समाज पक्षाच्या अध्यक्षा म्हणाल्या की, भारतासारख्या मोठी लोकसंख्या असणाऱ्या देशात हिंदू, मुस्लिम, शीख, ख्रिश्चन, बौद्ध आणि पारशी यांसारख्या वेगवेगळ्या धर्माचे लोक राहतात. त्यांची राहण्याची, खाण्या-पिण्याच्या पद्धतीमध्ये देखील विविधता बघायला मिळते. त्यांच्या परंपरांमध्ये देखील भिन्नता बघायला मिळते. या गोष्टीकडे दुर्लक्ष केले जाऊ शकत नाही.

देश मजबूत होईल

मायावती म्हणाल्या की, जर समान नागरी संहिता लागू झाली तर प्रत्येक धर्म मानणाऱ्या व्यक्तीला एकच कायदा लागू होईल, ज्यामुळे देश मजबूत होईल. ही गोष्ट अंशत: बरोबर आहे.

'आप'ने सर्वात आधी दिले होते समर्थन

समान नागरी संहितेला सर्वात आधी आम आदमी पक्षाने समर्थन दर्शवले होते. आम आदमी पक्षाचे राज्यसभेचे खासदार संदिप पाठक एका माध्यम संस्थेशी बोलताना म्हणाले होते की, त्यांचा पक्ष यूसीसीचा सैद्धांतिक स्वरुपात समर्थन करतो. ते म्हणाले होते की, भारतीय संविधानाच्या अनुच्छेद ४४ मध्ये देखील सांगण्यात आलंय की देशात समान नागरी संहिता असली पाहिजे.