बंगळूर : कावेरी नदी जल व्यवस्थापन प्राधिकरणाने (Cauvery River Water Management Authority) तमिळनाडूला पुन्हा पाणी सोडण्याचे कर्नाटक सरकारला (Karnataka Government) आदेश दिले आहेत.

दिल्ली येथे झालेल्या बैठकीत १ ते १५ नोव्हेंबर या कालावधीत तमिळनाडूला (Tamil Nadu) कावेरी नदीचे दररोज २,६०० क्युसेक पाणी सोडण्याच्या कावेरी जल नियंत्रण समितीच्या आदेशाला सहमती न देणाऱ्या कर्नाटकाने हे पाणी तमिळनाडूला सोडता येणार नाही, असा युक्तिवाद केला.

आवक शून्य आहे, सर्व जलाशयातून केवळ ५१ टीएमसी पाणीसाठा उपलब्ध आहे. पिण्यासाठी पाण्याची टंचाई भासणार असल्याने अतिरिक्त पाण्याचे संवर्धन करावे लागणार असून, कर्नाटकच्या अधिकाऱ्यांनी पाणी सोडता येणार नाही, असा युक्तिवाद करून मेकेदाटू प्रकल्पावर चर्चा करण्याचा आग्रह धरला.

मात्र, कर्नाटकला १ नोव्हेंबर ते २३ नोव्हेंबर या कालावधीत तमिळनाडूला दररोज २,६०० क्युसेक पाणी सोडण्याचे निर्देश देत, प्राधिकरणाने तमिळनाडूच्या विरोधादरम्यान माकेदाटू प्रकल्पावर चर्चा करण्यास सहमती दर्शविली.