पाटणा : जमिनीच्या बदल्यात नोकऱ्या दिल्याप्रकरणी सीबीआयने लालूप्रसाद यादव, राबडी देवी यांच्यासह १६ जणांविरुद्ध आरोपपत्र दाखल केले आहे. त्यानंतर बिहारचे मुख्यमंत्री नितीश कुमार लालू प्रसाद यादव कुटुंबाच्या बचावासाठी मैदानात उतरले आहेत. (Lalu Prasad Yadav news in Marathi)

नितीश कुमार म्हणाले आरोपपत्रात काहीही नाही. आम्ही एकत्र आलो आहोत, त्यामुळे भाजप वाट्टेल ते करत आहे. याला काहीही अर्थ नाही. सध्या बिहारमध्ये जेडीयू-आरजेडी युतीचे सरकार आहे. तर लालू यादव यांचे पुत्र तेजस्वी यादव हे नितीश सरकारमध्ये उपमुख्यमंत्री आहे.

मागील आघाडी सरकारच्या काळात लालू यादव कुटुंबावर जमिनीच्या बदल्यात नोकऱ्या दिल्याचा आरोप झाल्यानंतर नितीश कुमार यांनी आरजेडीशी संबंध तोडले होते. तसेच 2017 मध्ये भाजपसोबत सरकार स्थापन केले होते.

नितीश कुमार यांनी निवडणूक रणनीतीकार प्रशांत किशोर यांच्यावरही हल्लाबोल केला आहे. ते म्हणाले की, प्रशांत किशोर यांनी मला जेडीयू पक्ष काँग्रेसमध्ये विलीन करण्याचा सल्ला दिला होता. किशोर यांच्या पदयात्रेबद्दल काय सांगू, ते माझ्या घरी राहत असे. त्यांना जे बोलायचं ते बोलू द्या, मला फरक पडत नाही, असंही नितीश यांनी म्हटलं.