नवी दिल्ली : पूर्व लडाखमध्ये पँगाँग सरोवराच्या पलिकडे बेकायदा बळकाविलेल्या भागावर चीन पूल बांधत असल्याची माहिती केंद्र सरकारने आज संसदेत दिली. संबंधित भाग १९६२ पासून चीनच्या ताब्यात असून या बेकायदा ताब्याला भारताने कधीही मान्यता दिलेली नाही, असेही सरकारने स्पष्ट केले आहे. तसेच, भारताच्या सार्वभौमतेचा इतरांनी आदर करावा, असे आवाहन यावेळी करण्यात आले. (China developed Bridge At India's Land)

बळकाविलेल्या भागात चीन पूल बांधत असल्याची भारत सरकारने नोंद घेतली असल्याचे एका प्रश्‍नाला लेखी स्वरुपात उत्तर देताना सरकारने संसदेत सांगितले. ‘चीनच्या या बेकायदा ताब्याला भारताने कधीही मान्यता दिलेली नाही. जम्मू-काश्‍मीर आणि लडाख हे भारताचेच अविभाज्य भाग आहेत, हे भारताने अनेक प्रसंगी वारंवार स्पष्ट केले आहेत. इतर देशांनी भारताच्या या सार्वभौमतेचा आदर करावा, अशी आमची अपेक्षा आहे,’ असे सरकारने या लेखी उत्तरात म्हटले आहे.

चीन बांधत असलेला पूल पँगाँग सरोवरच्या उत्तर किनाऱ्यावर असून त्याची लांबी आठ मीटर आहे. याच भागात चिनी सैन्याने रुग्णालय आणि सैनिकांना राहण्यासाठी खोल्या बांधल्याचे दोन वर्षापूर्वी झालेल्या संघर्षानंतर दिसून आले होते. या संघर्षानंतर उच्चस्तरीय चर्चा होऊन शांतता निर्माण झाली आहे. मात्र, या पुलामुळे ही शांतता पुन्हा धोक्यात आली असल्याचे तज्ज्ञांचे म्हणणे आहे.

प्रत्यक्ष ताबा रेषेचा आदर, ‘जैसे थे’ स्थितीचा भंग केला जाऊ नये आणि दोन्ही देशांमध्ये झालेल्या करारांचे कठोरपणे पालन व्हावे या तीन मुद्द्यांच्या आधारावरच चीनबरोबर चर्चा केली जात असल्याचे सरकारने लेखी उत्तरात म्हटले आहे. चीनने अरुणाचल प्रदेशमधील काही भागांची नावे बदलल्याच्या घटनेचीही नोंद सरकारने घेतली आहे. चीनचे हे प्रयत्न निष्फळ असून अरुणाचल प्रदेश हा भारताच अविभाज्य भाग आहे, असे स्पष्ट करण्यात आले आहे.