नवी दिल्ली : भारतीय अंतराळ संशोधन संस्था अर्थात इस्रोच्या नव्या प्रक्षेपण परिसराशी संबंधित एका जाहिरातीत चीनचा झेंडा दाखवल्यानं तामिळनाडू सरकारवर टीकास्त्र सुरु झालं आहे. भाजपनं इथल्या डीएमके सरकारवर सडकून टीका केली असून जनतेची माफी मागण्याची मागणी केली आहे.

या पार्श्वभूमीवर आता तामिळनाडूच्या एका मंत्र्यानं यावर स्पष्टीकरण दिलं आहे. हा प्रकार म्हणजे डिझायनरची चूक होती, द्रमुकचा यामध्ये दुसरा काहीही हेतू नव्हता नव्हता असं म्हटलं आहे. आमच्या हृदयात भारतासाठी केवळ प्रेम आहे, असंही या मंत्र्यानं म्हटलं आहे. (china flag indian rocket adevertisement clarification by minister of tamilnadu govt)

वादग्रस्त जाहिरात देणारे द्रमुकचे नेते आणि मत्स्य पालन मंत्री अनिता आर. राधाकृष्णन यांनी म्हटलं की, भारत एकजूट राहिला पाहिजे. देशात जाती आणि धर्माच्या आधारे संघर्ष होता कामा नये. द्रमुकचे नेते दिवंगत एम. करुणानिधी यांनी पहिल्यांदा कुलसेकरपट्टिनम इथं इस्रोच्या एका नव्या प्रक्षेपण परिसराची मागणी केल्याचंही यावेळी त्यांनी सांगितलं. (Latest Marathi News)

भाजपनं केली माफीची मागणी

भाजपचे नेते केंद्रीय मंत्री एल. मुरुगन यांनी द्रमुकच्या त्या जाहिरात प्रकाशित करण्यावरुन तामिळनाडू सरकारनं लोकांची माफी मागावी अशी मागणी केली. मुरुगन यांनी म्हटलं की, जाहिरातीत भारतीय ध्वज लावणं आपलं कर्तव्य आहे, असंही त्यांनी म्हटलं आहे. (Marathi Tajya Batmya)

पंतप्रधान मोदींनी साधला थेट इशारा

यापूर्वी पंतप्रधान नरेंद्र मोदी यांनी बुधवारी कुलसेकरापट्टिनममध्ये इस्रोच्या नव्या परिसराचं भूमिपुजन केलं. याचा खर्च सुमारे ९८६ कोटी रुपये आहे. जेव्हा हा परिसर विकसित होईल तेव्हा इथून प्रत्येक वर्षी २४ प्रक्षेपणं केली जातील.

यावेळी कार्यक्रमाला संबोधित करताना मोदींनी आरोप केला होता की, द्रमुक सरकार काम करत नाही तर केवळ केंद्रीय योजनांवर आपले स्टिकर लावत आहे. यावेळी तर त्यांनी हद्दच केली ती म्हणजे इस्रोच्या परिसराचं श्रेय घेण्यासाठी तिथं चीनचा झेंड्याचं स्टिकर चिकटवलं. हा आपल्या देशाचा अपमान आहे, आपल्या देशातील अंतराळ संशोधकांचा अपमान आहे. तामिळनाडूचे लोक या कृत्यासाठी द्रमुकला शिक्षा देतील.