लडाख: "पूर्व लडाख आणि उत्तरेकडच्या सीमेवर चीनने (china) मोठ्या संख्येने आपलं सैन्य तैनातं केलं आहे" असं लष्करप्रमुख जनरल मनोज मुकुंद नरवणे (Manoj naravane) यांनी म्हटलं आहे. सुरक्षा स्थितीचा आढावा घेण्यासाठी लष्करप्रमुखांनी पूर्व लडाखमधील (eastern ladakh) फॉरवर्ड भागांचा दौरा केला. फॉरवर्ड भागांमध्ये (Forward area) चीनने मोठ्या प्रमाणावर सैन्य तैनाती केली असून, भारतासाठी हा चिंतेचा विषय असल्याचं लष्करप्रमुखांनी सांगितलं.

"चीनच्या सर्व हालचालींवर आमचे बारीक लक्ष आहे. त्यांचा मुकाबला करण्यासाठी त्याच तोडीचं इन्फ्रास्ट्रक्चर आणि सैन्य तैनातीच्या दृष्टीने तयारीत आहोत" असे लष्कराने म्हटले आहे. या स्थितीत भारत कुठल्याही परिस्थितीचा सामना करण्यासाठी सज्ज आहे असे नरवणे यांनी एएनआयला सांगितले.

"मागच्या सहा महिन्यांपासून परिस्थिती सामान्य होती. ऑक्टोंबरच्या दुसऱ्या आठवड्यात तेराव्या फेरीची चर्चा होणार आहे. त्यावेळी तणावावर तोडगा दृष्टीपथात येईल" अशी अपेक्षा नरवणे यांनी व्यक्त केली. "मतभेदांवर चर्चेतून मार्ग काढावा असे माझे ठाम मत आहे. आम्ही यातून काहीतरी तोडगा काढू" अशी अपेक्षा आहे असे नरवणे म्हणाले.

पूर्व लडाखमध्ये भारतीय लष्कराने चीनसोबतच्या प्रत्यक्ष नियंत्रण रेषेवर लडाख सेक्टरमध्ये पहिली K9-वज्र स्वयंचलित होवित्झर रेजिमेंट तैनात केली आहे. ही K9-वज्र स्वयंचलित होवित्झर तोफ शत्रूच्या लक्ष्यांवर सुमारे 50 किमीवर हल्ला करू शकते.