हरियाणा : कोरोनाची वाढती प्रकरणे पाहता हरियाणा सरकारने आणखी सहा जिल्ह्यांतील सिनेमा हॉल, मल्टिप्लेक्स आणि क्रीडा संकुल १२ जानेवारीपर्यंत बंद ठेवण्याचे आदेश दिले आहेत. ज्या नवीन जिल्ह्यांमध्ये निर्बंध लादले आहेत त्यात कर्नाल, पानिपत, कुरुक्षेत्र, यमुनानगर, रोहतक आणि झज्जर यांचा समावेश आहे. गुडगाव, फरिदाबाद, अंबाला, पंचकुला आणि सोनीपतमध्ये २ ते १२ जानेवारीपर्यंत निर्बंध आधीच लागू आहेत.

हरियाणा राज्य आपत्ती व्यवस्थापन प्राधिकरणाने जारी केलेल्या ताज्या आदेशानुसार, १२ जानेवारीला सकाळी ५ वाजेपर्यंत सर्व ११ जिल्ह्यांमध्ये निर्बंध लागू राहतील. सिनेमा हॉल आणि मल्टिप्लेक्स बंद राहतील; परंतु, मॉल्स आणि मार्केट सायंकाळी सहा वाजेपर्यंत सुरू ठेवण्याची परवानगी असेल. नागरिकांना त्रास होऊ नये म्हणून दूध आणि औषधे यासारख्या जीवनावश्यक वस्तूंची विक्री करणारी दुकाने उघडण्यास परवानगी दिली जाईल. यापूर्वी पाच जिल्ह्यांमध्ये लागू केलेल्या निर्बंधांनुसार मॉल्स आणि बाजारपेठा बंद करण्याची वेळ सायंकाळी ५ वाजता होती.

सर्व क्रीडा संकुले, जलतरण तलाव आणि स्टेडियम बंद राहतील. परंतु, राष्ट्रीय आणि आंतरराष्ट्रीय क्रीडा स्पर्धांमध्ये सहभागी होणाऱ्या खेळाडूंच्या प्रशिक्षणासाठी ते उघडता येतील, असे आदेशात म्हटले आहे. सर्व मनोरंजन पार्क आणि प्रदर्शनांवरील बंदी कायम राहील. सरकारी आणि खाजगी कार्यालयांना आपत्कालीन/अत्यावश्यक सेवा वगळता ५० टक्के कर्मचाऱ्यांच्या उपस्थितीत काम करण्याचा सल्ला दिला आहे. १ जानेवारीचा आदेश आणि १२ जानेवारीपर्यंत लागू असणारे इतर निर्बंध पूर्वीप्रमाणेच कायम राहतील, असे आदेशात म्हटले आहे.

कोविडच्या प्रकरणांमध्ये झपाट्याने वाढ

हरियाणामध्ये एका आठवड्यात कोविडच्या प्रकरणांमध्ये झपाट्याने वाढ झाली आहे. अधिकृत आकडेवारीनुसार बुधवारी राज्यात २,१७६ नवीन कोविड प्रकरणे नोंदवली गेली, तर मंगळवारी १,१३२. आकडेवारीनुसार बुधवारी नोंदवलेल्या २,१७६ प्रकरणांपैकी १,१७८ एकट्या गुडगावमधील आहेत. इतर अनेक जिल्ह्यांमध्येही प्रकरणांमध्ये वाढ होत आहे.

रात्री नाइट कर्फ्यू

कोरोना विषाणूचा प्रादुर्भाव रोखण्यासाठी राज्य सरकारने लसीकरणासाठी पात्र असूनही अद्याप लसीकरण न केलेल्यांना १ जानेवारीपासून शॉपिंग मॉल, सिनेमा हॉल, रेस्टॉरंट आणि धान्य मार्केटमध्ये जाण्यास बंदी घातली होती. विशेष म्हणजे राज्यात रात्री ११ ते पहाटे ५ वाजेपर्यंत नाइट कर्फ्यू लागू आहे.