बंगळूर : टी. ए. सरवण (T. A. Saravana) यांना विधान परिषदेचे सदस्य बनवण्यासाठी त्यांच्याकडून पैसे घेतल्याचा आरोप माजी प्रदेशाध्यक्ष सी. एम. इब्राहिम (C. M. Ibrahim) यांनी माजी मुख्यमंत्री एच. डी. कुमारस्वामी (H. D. Kumaraswamy) यांच्यावर केला. पैसे घेतले नसल्याची शपथ घेण्याचे त्यांनी आव्हान दिले.

शिवाय, कुमारस्वामी यांनी हिंमत असेल तर आमदारकीचा राजीनामा देऊन चन्नपटण येथून पुन्हा जिंकून दाखवावे, असे आव्हानही त्यांनी दिले. पत्रकारांशी बोलताना ते म्हणाले, ‘‘कुमारस्वामी, तुम्ही तुमच्या मुलाच्या डोक्यावर हात ठेवून शपथ घ्या की, सरवण यांना विधान परिषदेचा सदस्य बनवण्यासाठी तुम्ही पैसे घेतले नाहीत.

भाजपचे प्रदेशाध्यक्ष विजयेंद्र आणि विरोधी पक्षनेते अशोक आहेत. तुम्ही जाऊन त्यांच्यासमोर उभे राहणार का? दोन जागांसाठी देवेगौडांनी अमित शहांसमोर जाऊन उभे रहायला हवे होते का? चन्नपट्टणमध्ये २० हजार मुस्लिम मते मिळवून जिंकला आहात. पण ती मते कोणामुळे आली.’’

धजदचे माजी प्रदेशाध्यक्ष सी. एम. इब्राहिम यांना पक्षविरोधी कारवायांसाठी पक्षातून निलंबित करण्यात आले आहे. धजद प्रमुख एच. डी. देवेगौडा यांनी यासंदर्भात अधिकृत आदेश जारी केला आहे. पक्षाच्या हितासाठी इब्राहिम यांना संविधान आणि पक्षाच्या नियमांतर्गत शिस्तीचे उल्लंघन केल्यामुळे निलंबित करण्यात आल्याचे म्हटले आहे.