बंगळूर : राज्यातील भाजप सरकार (BJP Government) सत्तेवरून पायउतार झाल्यानंतर मुख्यमंत्री सिद्धरामय्या यांच्या नेतृत्वाखाली काँग्रेसचे (Congress) सरकार अस्तित्वात आले. विधानसभा निवडणुकीत दारुण पराभव पत्करावा लागल्यानंतर भाजपमध्ये विरोधी पक्षनेता कोण होणार, याची जोरदार चर्चा सुरू आहे.

भाजपमध्ये विरोधी पक्षनेतेपद मिळविण्यासाठीही जोरदार स्पर्धा सुरू असल्याचे चित्र आहे. दरम्यान, माजी मुख्यमंत्री बसवराज बोम्मई (Basavaraj Bommai) यांनी ज्येष्ठ नेते बी. एस. येडियुराप्पा (B. S. Yediyurappa) यांची भेट घेऊन विरोधी पक्षनेतेपदासह राज्यातील राजकीय घडामोडींवर चर्चा केल्याची माहिती आहे.

राष्ट्रीय नेते आमदारांसोबत अनौपचारिक बैठका घेऊन मते जाणून घेत आहेत. मात्र, जुलैमध्ये होणाऱ्या अर्थसंकल्पीय अधिवेशनापूर्वी अंतिम निर्णय होण्याची शक्यता असल्याचे भाजपच्या सूत्रांनी सांगितले. बोम्मई, आर. अशोक, सुनीलकुमार आणि ज्येष्ठ आमदार बसनगौडा पाटील-यत्नाळ हे विरोधी पक्षनेतेपदाच्या शर्यतीत आघाडीवर आहेत.