नवी दिल्ली : माझ्यावर पक्षाचे पद आणि तिकीटे विकण्याचा आरोप केला जात आहे. हे आरोप अत्यंत गंभीर आहेत. पक्षाच्या प्रदेशाध्यक्ष, मुख्यमंत्री, सरचिटणीस आणि काँग्रेस कार्यकारीणीच्या सदस्यावर म्हणजेच माझ्यावर हे गंभीर आरोप केले आहेत. यामुळे माझा स्वाभिमान दुखावला आहे. त्यामुळे माझी काँग्रेस पक्षातून (Congress) हकालपट्टी करावी, अशी विनंती हरीश रावत (Harish Rawat) यांनी केली आहे.

महत्वाच्या पदावर बसलेल्या व्यक्तींनी माझ्यावर तिकीट विक्री आणि पदांची विक्री केल्याचा आरोप लावला आहे. मी काँग्रेसचा मुख्यमंत्री राहिलो आहे. काँग्रेस प्रदेशाध्यक्ष, सरचिटणीस या भूमिका निभावल्या. इतकेच नाहीतर मी काँग्रेस कार्यकारीणीचा सदस्य आहे. अशा व्यक्तीवर एका महत्वाच्या पदावर बसलेली व्यक्ती आरोप करत असेल आणि अशाच पदावर बसलेल्या व्यक्तीकडून त्याचा प्रचार प्रसार होत असेल तर ते आऱोप नक्कीच गंभीर होतात. या आरोपांखाली माझी काँग्रेस पक्षातून हकालपट्टी करावी, अशी देवाला प्रार्थना करतो. होळीच्या दिवशी वाईट विचारांचं दहन केलं जाते. त्याचप्रमाणे या हरिश रावत रुपी वाईट विचारांचं काँग्रेसने दहन करावं, असे हरीश रावत म्हणाले आहेत.

हरिश रावत यांनी आपल्या ट्विटमध्ये आरोप करणाऱ्या नेत्याचे थेट नाव घेतली नाही. पण, ही आरोप करणारी व्यक्ती महत्वाच्या पदावर असल्याचे त्यांनी सांगितले. काँग्रेसने त्यांच्यावर उत्तराखंड निवडणुकीची जबाबदारी सोपवली होती. ते काँग्रेसचा मुख्यमंत्रिपदाचा चेहरा देखील होते. याठिकाणी काँग्रेसला यश मिळेल अशी आशा होती. पण, एकूण ७० जागांपैकी काँग्रेसला फक्त १९ जागा जिंकता आल्या. इतकेच नाहीतर हरिश रावत यांचाही उत्तराखंड निवडणुकीत लालकुआ मतदारसंघातून पराभव झाला आहे.