नवी दिल्ली- काँग्रेसने बुधवारी छत्तीसगडमधील विधानसभा निवडणुकीसाठी उमेदवारांची दुसरी यादी जाहीर केली आहे. या यादीमध्ये ५३ उमेदवारांचा समावेश आहे. दोन दिवसापूर्वी काँग्रेसने ३० उमेदवारांची पहिली यादी जाहीर केली होती. (Congress on Wednesday released its second list of 53 candidates for the Chhattisgarh assembly polls)

छत्तीसगडमध्ये दोन टप्प्यामध्ये निवडणुका पार पडणार आहेत. ७ आणि १७ नोव्हेंबरला राज्यात मतदान होईल. त्यानंतर ३ डिसेंबरला मतमोजणी होईल. राज्यात भूपेश बघेल यांची सत्ता आहे. पुन्हा एकदा सरकार स्थापन करण्याचा काँग्रेसचा प्रयत्न असणार आहे. विविध सर्व्हेमध्ये भूपेश बघेल यांनाच पुन्हा जनता संधी देईल असा अंदाज वर्तवला आहे.

काँग्रेसने बुधवारी दुसऱ्या यादीत ५३ उमेदवारांची घोषणा केली असल्याने, आतापर्यंत काँग्रेस पक्षाकडून जाहीर करण्यात आलेल्या उमेदवारांची संख्या ८३ झाली आहे. काँग्रेसने रविवारी उमेदवारांची पहिली यादी जाहीर केली होती. छत्तीसगडमध्ये विधानसभेच्या एकूण ९० जागा आहेत. राज्यात काँग्रेस विरुद्ध भाजप अशी लढत पाहायला मिळणार आहे.

निवडणूक आयोगाने पाच राज्यातील विधानसभा निवडणुकांची घोषणा केली आहे. या पाच राज्यातील मतदान नोव्हेंबर महिन्यामध्ये पार पडले. तर सर्व राज्यांचा निकाल ३ डिसेंबरला लागेल. छत्तीसगडमध्ये काँग्रेसची सत्ता आहे, तर मध्य प्रदेशमध्ये भाजप सत्तेत आहे. राजस्थानमध्येही काँग्रेसची सत्ता आहे, तर तेलंगणामध्ये भारत राष्ट्र समितीचे सरकार आहे. मिझोराममध्ये मिझो नॅशनल फ्रंटचे सरकार आहे. (Latest Marathi News)