नवी दिल्ली- २२ जानेवारीला अयोध्यतील राम मंदिरात राम लल्लाची प्राणप्रतिष्ठा होणार आहे. या सोहळ्यासाठी काँग्रेसच्या माजी अध्यक्ष सोनिया गांधी आणि काँग्रेस अध्यक्ष मल्लिकार्जुन खरगे यांनी न जाण्याचा निर्णय घेतला आहे. सोनिया गांधी यांनी या सर्व कार्यक्रमाला भारतीय जनता पक्ष आणि राष्ट्रीय स्वयंसेवक संघाचा इव्हेंट ठरवलं आहे. ( Congress president Mallikarjun Kharge Sonia Gandhi decline the invitation of ram mandir ayodhya)

काँग्रेसचे प्रमुख सचिव जयराम रमेश यांनी याबाबत पत्रक जारी केलं आहे. यात सांगण्यात आलंय की, काँग्रेस अध्यक्ष मल्लिकार्जुन खरगे, वरिष्ठ नेत्या सोनिया गांधी, पक्ष नेते अधीर रंजन चौधरी हे राम मंदिर सोहळ्याच्या उद्घाटनाचे निमंत्रण स्वीकारणार नाही. कारण हा पूर्णपणे भाजप आणि आरएसएस यांचे इव्हेंट आहे.

मल्लिकार्जुन खरगे, सोनिया गांधी, अधीर रंजन चौधरी यांना श्रीराम जन्मभूमी ट्र्स्टने काही दिवसांपूर्वी सोहळ्याचे निमंत्रण पाठवले होते. पण, यावर काँग्रेस नेत्यांकडून कोणतीही भूमिका घेण्यात आली नव्हती. अखेर मंगळवारी काँग्रेसने यासंदर्भात आपली भूमिका स्पष्ट केली आहे. भाजप राम मंदिराच्या मुद्द्यावरुन राजकारण करत असल्याचं म्हणत नेत्यांनी जाणं टाळलं आहे.

प्रभू रामाची पूजा देशातील लाखो लोक करतात. धर्म हा खासगी विषय आहे. पण, भाजप आणि आरएसएसने अयोध्येतील राम मंदिराला राजकीय प्रोजेक्ट बनवलं आहे. मंदिराचे काम अपूर्ण असताना निवडणुका डोळ्यासमोर ठेवून भाजप नेते मंदिराचे उद्घाटन करत आहेत. लाखो लोकांच्या भावनांचा आदर करत काँग्रेस नेत्यांनी सोहळ्यासाठी न जाण्याचा निर्णय घेतला आहे, अशी माहिती काँग्रेसच्या पत्रकार देण्यात आली आहे. (Latest Marathi News)