बंगळुरु : कर्नाटकचे (Karnataka) माजी मंत्री आणि भाजप नेते केएस ईश्वरप्पा (BJP leader KS Eshwarappa) यांना मोठा दिलासा मिळालाय. कंत्राटदाराच्या आत्महत्येप्रकरणी ईश्वरप्पांची निर्दोष मुक्तता करण्यात आलीय. या प्रकरणामुळं त्यांना मंत्रिपदावरूनही पायउतार व्हावं लागलं होतं. कारण, ठेकेदारानं व्हॉट्सअॅप मेसेजमध्ये केएस ईश्वरप्पा यांना मृत्यूसाठी जबाबदार धरलं होतं.

या प्रकरणी कर्नाटक पोलिसांनी (Karnataka Police) 12 एप्रिल रोजी संतोष पाटील (Santosh Patil) यांनी आत्महत्या केल्याचं सांगितलं. पोलिसांनी या प्रकरणाचा तपास केला, पण फारसा पुरावा सापडला नाही. आता या प्रकरणात पुराव्याअभावी माजी मंत्री निर्दोष सुटले आहेत. याबाबत उडुपी पोलिसांनी (Udupi Police) न्यायालयात अहवालही दाखल केलाय.

ईश्वरप्पा यांच्याकडं मंत्री म्हणून पंचायत राज खात्याची जबाबदारी होती. आत्महत्या केलेल्या संतोष पाटील या कंत्राटदारानं आरडीपीआर विभागात काम केल्याचं आपल्या आरोपात म्हटलं होतं. ते काम 4 कोटींचं होतं. मात्र, त्यांना मोबदला मिळाला नाही. पाटील यांनी आधी पत्नीचं दागिनं विकून कर्ज फेडलं, मात्र 4 कोटींच्या कामासाठी मंत्री 40 टक्के कमिशन मागत होते. कोणताही मार्ग शिल्लक नसताना त्यांनी हे पाऊल उचललं. त्यानंतर त्यांचा मृतदेह उडुपीतील एका खासगी लॉजमध्ये सापडला होता.