भारतात कोरोनाच्या (Corona) तिसऱ्या लाटेत नव्या रुग्णांच्या संख्योत मोठी वाढ होत आहे. बुधवारच्या तुलनेत आज गुरुवारी नव्या रुग्णांची संख्या तब्बल २७ टक्क्यांनी वाढली आहे. गेल्या २४ तासात देशात २ लाख ४७ हजार ४१७ कोरोनाचे नवे रुग्ण आढळून आले आहेत. तर ८४ हजार ८२५ जण कोरोमुक्त झाले. सध्या देशात सक्रीय रुग्णांची संख्या ११ लाख १७ हजार ५३१ इतकी आहे.

ओमिक्रॉन (Omicron) बाधितांची संख्याही दिवसेंदिवस वाढत चालली आहे. कालच्या तुलनेत आज जवळपास सहाशे ओमिक्रॉन बाधितांची भर पडली आहे. आतापर्यंत देशात ५ हजार ४८८ ओमिक्रॉनचे रुग्ण आढळून आले आहे. तर देशातील दैनंदिन पॉझिटिव्हीटी रेट हा १३.११ टक्क्यांवर पोहोचला आहे.

देशातील ३०० जिल्ह्यांमध्ये आठवड्याचा संसर्ग दर हा ५ टक्क्यांहून जास्त आहे. यामध्ये पश्चिम बंगाल, महाराष्ट्र, दिल्ली, तामिळनाडु, उत्तर प्रदेश, कर्नाटक, केरळ, गुजरात या राज्यातील परिस्थिती चिंताजनक अशी असल्याचं केंद्रीय आरोग्य मंत्रालयाने म्हटलं आहे. केंद्रीय आरोग्य सहसचिव लव अग्रवाल यांनी अशी माहिती दिली की, कोरोनाच्या संसर्गात ३० डिसेंबरला १.१ टक्के वाढ झाली. तर हेच प्रमाण बुधवारी ११.०५ टक्क्यांवर पोहोचलं आहे. जगभरात १० जानेवारीला ३१ लाख ५९ हजार कोरोनाचे रुग्ण आढळले होते. आतापर्यंतची ही सर्वात मोठी संख्या आहे.