कोरोनाचा प्रार्दुभाव रोखण्यासाठी आरोग्य विभागाकडून तीन प्रमुख उपाययोजना सांगण्यात आल्या आहेत. यात सोशल डिस्टंसिंग पाळणे, सॅनिटायझरचा वापर करणे आणि मास्क वापरणे या तीन गोष्टी आवर्जुन केल्या पाहिजेत. म्हणूनच, आज प्रत्येक जण हात धुतांना किंवा सॅनिटायझरचा वापर करतांना दिसतो. प्रत्येक नियमांचं पालन करावं. मात्र, त्याचा अतिरेक होणार नाही याकडेही लक्ष द्यावं. आजकाल अनेक जण सॅनिटायझरचा अतिरेकी वापर करतांना दिसतात. यामध्येच सध्या सोशल मीडियावर अशाच एका आजोबांचा व्हिडीओ व्हायरल झाला आहे. कोरोनापासून वाचण्यासाठी या आजोबांनीच चक्क संपूर्ण शरीराला सॅनिटायझर (sanitizers) लावलं आहे. विशेष म्हणजे बॉडीलोशन (body lotion) असल्याप्रमाणे ते सॅनिटायझर लावत आहेत.(corona-video-chachas-cannot-be-stopped-the-sanitizers-look-like-they-are-applying-body-lotion-watch-the-video)

व्हायरल होत असलेला व्हिडीओ आयपीएस ऑफिसर रुपिन शर्मा यांनी शेअर केला आहे. या व्हिडीओमध्ये एक आजोबा वेटिंग रुममध्ये बसल्याचं दिसून येत आहे. यावेळी एक मुलगा येऊन त्याने तेथे उपस्थित असलेल्या प्रत्येक व्यक्तीला हात सॅनिटाइज करण्यासाठी सॅनिटायझर दिलं. विशेष म्हणजे या आजोबांनी केवळ हाताच नाही तर चक्क संपूर्ण शरीर सॅनिटाइज केलं आहे. आजोबांनी हातासोबतच पाय, चेहरा, डोकं आणि केस असं संपूर्ण शरीराला सॅनिटायझर लावलं. मात्र, सॅनिटायझर लावण्याच्या नादात त्यांचा मास्क खालती पडला.

हा व्हिडीओ शेअर करत कोरोनासुद्धा या आजोबांचा केस वाकडे करु शकणार नाही. पण, काका तो मास्क काढायला नको होतात, असं कॅप्शन रुपिन शर्मा यांनी दिलं आहे.

दरम्यान, हा व्हिडीओ सध्या सोशल मीडियावर तुफान व्हायरल होत आहे. अनेक जण हा व्हिडीओ पाहून हसून बेजार झाले आहेत. आतापर्यंत या व्हिडीओला चार हजारांपेक्षा जास्त व्ह्युज मिळाले आहेत. तर ४०० पेक्षा अधिक लाइक्स मिळाले आहेत.