उत्तर प्रदेशच्या (Uttar Pradesh) कासगंजमध्ये काही दिवसांपूर्वी एक धक्कादाय घटना घडली. एका युवकाचा तीन महिन्यांपुर्वी संशयास्पदरित्या मृत्यू झाला होता. कोर्टाने आता या प्रकरणात महत्वाचे आदेश दिले आहेत. संशयास्पद मृत्यू झालेल्या या तरुणाची कबर खोदून त्याच्या मृतदेहाचं शवविच्छेदन करण्याचे आदेश दिले आहेत. अल्ताफने दुसऱ्या धर्मच्या मुलीला पळवून नेल्याचा आरोप होता.

अल्ताफचा मृतदेह पोलीस ठाण्याच्या बाथरूममध्ये मिळाला होता. एका पाईपला लटकलेल्या अवस्थेत हा मृतदेह आढळला होता. पोलिसांच्या मारहाणीत या तरूणाचा मृत्यू झाल्याचा आरोप कुटुंबीयांनी केला आहे. मृत तरुणाच्या पित्याने याप्रकरणी उच्च न्यायालयात धाव घेतली होती. शुक्रवारी या प्रकरणात सुनावणी झाल्यानंतर न्यायालयाने कबर खोदून मृतदेहाचं शवविच्छेदन करण्याचे आदेश दिले आहेत.

उच्च न्यायालयाने शुक्रवारी दिलेल्या आदेशात न्यायमूर्ती अंजनी कुमार मिश्रा आणि न्यायमूर्ती दीपक वर्मा यांनी यूपी सरकारचे अतिरिक्त महाधिवक्ता मनीष गोयल यांना विचारलं की, राज्याबाहेरील AIMS मध्ये शवविच्छेदन करण्यास सरकारला काही आक्षेप आहे का? यावर सरकारने आक्षेप नसल्याचं सांगितलं. यानंतर न्यायालयानं राज्य सरकारला अल्ताफचा मृतदेह कबरीतून बाहेर काढण्याचे आणि एम्स नवी दिल्ली येथे पुन्हा पोस्टमॉर्टम करण्याचे आदेश दिले.