नवी दिल्ली - कोरोनाला रोखण्यासाठी देशात लसीकरण मोहिम वेगाने राबवली जात आहे. सोमवारी 1 मेपासून 18 वर्षांवरील सर्वांना लस देण्यात येणार आहे. मोदी सरकारने हा निर्णय घेतला असून लस निर्मात्यांकडून थेट राज्यांना विकता येणार आहे. मात्र हे प्रमाण 50 टक्के असेल. याआधी दोन टप्प्यात लसीकरण मोहिम सुरु झाली आहे. आता तिसऱ्या टप्प्यात 18 वर्षांवरील सर्वांना लस देण्यात येणार आहे. तिसऱ्या टप्प्यात लस कमी पडू नये यासाठी लस खरेदीच्या नियमांमध्ये सूट देण्यात आली आहे. तसचं राज्यांना आता थेट लस निर्मिती करणाऱ्या कंपन्यांकडून अतिरिक्त डोस विकत घेता येणार आहेत.

तिसऱ्या टप्प्यातील लसीकरण मोहिमेसाठी रजिस्ट्रेशनला दोन दिवसात सुरुवात होणार आहे. CoWin अॅपच्या माध्यमातून नोंदणी करावी लागेल. दरम्यान, कालच सीरम इन्स्टिट्यूटने लशीचे डोस आणि त्याची किंमत यांची माहिती दिली होती. राज्यांना लस 400 रुपयांना तर खासगी रुग्णालयांना 600 रुपयांमध्ये लस दिली जाणार आहे. केंद्रासाठी मात्र 150 रुपये इतकीच किंमत राहील.

सरकारकडून सुरु करण्यात आलेल्या कोविड 19 लसीकरण केंद्रावर लस मोफत देण्यात येईल. तर खासगी रुग्णालयात पारदर्शकपणे लशीसाठी सेल्फ सेट कॉस्टची घोषणा केली जाण्याची शक्यता आहे. 1 मे पासून सुरु होणाऱ्या लसीकरण मोहिमेत लस घेण्यासाठी CoWIN अॅपमध्ये रजिस्ट्रेशन करणं गरजेचं आहे.

रजिस्ट्रेशन कसं करायचं?

CoWIN चे अधिकृत संकेतस्थळ cowin.gov.in वर तुम्हाला मोबाइल क्रमांक किंवा आधार नंबर द्यावा लागेल.

तुमच्या मोबाइलवर त्यानंतर एक ओटीपी येईल तो सबमिट करावा लागेल.

लॉग इन केल्यानंतर तुम्हाला रजिस्ट्रेशन केलेल्या लोकांची नावे दिसतील.

तुम्हाला लस कधी घ्यायची, कोणत्या वेळेत घ्यायची हे निश्चित करता येतं.

त्यासाठी नावाची यादी येते त्यासमोर कॅलेंडर दिसतं. तिथं तारीख निवडता येते.

त्यानंतर तुमचं राज्य, जिल्हा, शहर, वॉर्ड, पिन नंबर याची माहिती द्या.

कोणती कागदपत्रे लागतात?

लसीकरणासाठी नोंदणी करत असताना तुमच्याकडे ओळखपत्र हंव.

ओळखपत्रावर तुमचा फोटो असायला हवा.

कोविन अॅपवर नोंदणी करताना केवायसी ओळखपत्र स्कॅन करून जोडावं लागतं.

आधार कार्ड

पॅन कार्ड

मतदान ओळखपत्र

ड्रायव्हिंग लायसन

कामगार मंत्रालयाने दिलेलं आरोग्य विमा स्मार्ट कार्ड

MGNREGA जॉब कार्ड

पासपोर्ट

बँक / पोस्ट ऑफिसचे पासबुक

पेन्शनची कागदपत्रे

लसीकरणानंतर काय?

लस घेतल्यानंतर तुम्हाला एक रेफरन्स आयडी मिळेल.

रेफरन्स आयडीवरून लसीकरणाचे सर्टिफिकेट मिळेल.