New Jamtara : देशातील सायबर फसवणुकीचे केंद्रस्थान म्हणून 'नवीन जामतारा ' म्हणून कुख्यात असलेल्या भागाला या आठवड्यात पहिला मोठा धक्का बसला. हरियाणा पोलिसांनी गुरुवार आणि शुक्रवारी १२५ संशयितांना ताब्यात घेतले. झारखंडच्या जामतारा नंतर सायबर ठगांचे नवे हॉट स्पॉट बनलेल्या मेवातमधील सायबर ठगांवर गुरुवारी दुपारी ३ ते शुक्रवारी सकाळी ९ वाजेपर्यंत छापेमारी करण्यात आली.

नूहच्या पुन्हाणा शहरातील बिछोर पोलीस स्टेशन हद्दीतील १४ गावांमध्ये ३०० ठिकाणी ५ हजार पोलिसांनी कारवाई केली. यावेळी पोलिसांनी १२५ जणांना ताब्यात घेतले आहे. त्यांची चौकशी करून पडताळणी केली जात आहे.

खेडला, लुहिंगा खुर्द, लुहिंगा कलान, गोकलपूर, गोडोला, अमीनाबाद, महू, गुलालता, जैमत, जाखोपूर, नई, तिरवारा, मामलिका आणि पापडा या गावांमध्ये छापे टाकण्यात आले.

सायबर आणि इतर गुन्हेगारी प्रकरणात सहभागी असलेल्या आरोपींना लक्ष्य करून हा छापा टाकण्यात आला. प्राथमिक तपासात अटक करण्यात आलेल्या आरोपींचे अन्य राज्यातील सायबर गुन्हेगारांशीही संबंध असल्याचे समोर आले असून, त्यादृष्टीने तपास सुरू आहे.

डीआयजी एसटीएफ सिमरदीप सिंग आणि नूहचे एसपी वरुण सिंगला यांनी शुक्रवारी दुपारी एसटीएफच्या भोंडसी कार्यालयात पत्रकार परिषद घेऊन छाप्याची माहिती दिली.

सिमरदीप सिंग म्हणाले, ऑपरेशनचे नियोजन करण्यासाठी एक महिना लागला. या छाप्यांमुळे त्यांच्या कारवाया बंद होतील. यामुळे हरियाणातही सायबर फसवणुकीची संख्या कमी होण्यास मदत होईल.