पटियाला : पंजाबमधल्या पटियाला भागात उसळलेल्या हिंसाचारानंतर शहरात संचारबंदी लागू करण्यात आली आहे. सायंकाळी 7 ते सकाळी 6 वाजेपर्यंत ही संचारबंदी लागू करण्यात आली आहे. पतियाळा पोलिसांनी सांगितले की, हिंसाचाराच्या प्रकरणात एफआयआर देखील नोंदवला जाईल आणि अटक देखील केली जाईल. सध्या दोन्ही पक्षांमध्ये शांतता समितीची बैठक आयोजित करण्याचे प्रयत्न सुरू असल्याचे पोलिसांनी सांगितले.

पटियाला येथील संघर्षाची घटना अत्यंत दुर्दैवी असल्याचे मत पंजाबचे मुख्यमंत्री भगवंत मान यांनी व्यक्त केले असून, घटनेनंतर आपण पोलीस महासंचालकांशी चर्चा केली आहे. तसेच परिसरात शांतता मिळवण्यात पोलिसांना यश आले असून, पोलीस परिस्थितीवर बारकाईने लक्ष ठेवून असल्याचे ते म्हणाले. राज्यात कोणालाही अशांतता निर्माण करू देणार नसल्याचेही त्यांनी यावेळी सांगितले. नागरिकांनी उफवांर विश्वास ठेवू नये असेही आवाह पोलिसांकडून करण्यात आले आहे.

शिवसेनेचे पंजाबमधले कार्यकारी प्रमुख हरिश सिंगला यांच्या नेतृत्वाखाली आज खलिस्तान मुर्दाबाद मोर्चा काढण्यात आला होता. शिवसैनिक खलिस्तान मुर्दाबादच्या घोषणा देत होते. त्यावेळी शिवसेना आणि शीख संघटना आमनेसामने आल्यानंतर काहीकाळ येथील वातावरण तणावपूर्व बनले होते. या मोर्चाच्या विरोधात काही शीख युवकांनी शिवसैनिकांना माकड सेना म्हणत मुर्दाबादच्या घोषणा दिल्या. त्यामुळे परिस्थिती तणावपूर्ण झाली होती.