नवी दिल्लीः दिल्लीमध्ये हादरवून सोडणारा प्रकार घडला आहे. मेट्रोमध्ये काम करणाऱ्या एका कर्मचाऱ्याने पत्नी आणि दोन मुलांवर चाकूने सपासप् वार केले. त्यानंतर त्याने स्वतःला गळफास लावून घेतला.

दिल्लीतल्या शाहदरा येथील ज्योती कॉलनीमध्ये ही घटना घडली आहे. दिल्लीत राहणारे सुशील कुमार (वय ४५), पत्नी अनुराधा (वय ४०), मुलगी आदिती ( वय ६) यांचा या घटनेमध्ये मृत्यू झाला आहे. तर तेरा वर्षांच्या युवराजवर रुग्णालयात उपचार सुरु आहेत.

शाहदराचे पोलिस उपायुक्त रोहित मीना यांनी माहिती दिली की, सुशील कुमार हे दिल्ली मेट्रोमध्ये पर्यवेक्षक म्हणून काम करत होते. त्यांनी कुटुंबातील सर्व सदस्यांवर चाकूने वार केले. त्यानंतर स्वतःला फाशी घेतली.

फाशी घेण्यापूर्वी सुशीलने संगणकावर फाशी कशी घ्यायची, याची माहिती घेतली होती. दिल्ली मेट्रोच्या कर्मचाऱ्याने पोलिसांना यासंबंधीची माहिती दिली. सुशील कार्यालयात न आल्याने त्यांना एका सहकाऱ्याने फोन केला. तेव्हा सुशीलने 'मी सगळ्यांना मारले' असं सांगितलं. त्यामुळे घटनेचा खुलासा झाला.

त्यानंतर पोलिसांना यासंबंधीची माहिती देण्यात आली. पोलिस सुशीलच्या घरी पोहोचले तेव्हा त्यांनी तीन मृतदेह सापडले. सुशीलने आत्महत्या करण्यापूर्वी पत्नी आणि दोन मुलांवर चाकूने सपासप् वार केले. यामध्ये पत्नी आणि मुलगी आदिती यांचा मृत्यू झाला तर युवराज या मुलावर उपचार सुरु आहेत.

या खूनाच्या घटनेने दिल्ली हादरली आहे. पोलिस या प्रकरणाचा कसून तपास करीत आहेत. फॉरेन्सिकची टीमने घटनास्थळाची पाहाणी केली. सुशीलने हे हत्याकांड का केलं, याचं कारण कळलेलं नाही. पोलिस प्रकरणाचा तपास करीत आहेत.