DK Shivakumar's Escort Car Overturns on Mysuru-Bengaluru Highway: कर्नाटकचे उपमुख्यमंत्री डीके शिवकुमार यांच्या वाहन ताफ्यातील कार म्हैसुर - बंगळुरु महामार्गावर उलटल्याची माहिती समोर आली आहे. या दुर्घटनेत डीके शिवकुमार यांच्या सुरक्षा रक्षकास दुखापत झाल्याचीही माहिती समोर येत आहे.

याबाबत अधिक माहिती अशी की, कर्नाटकचे उपमुख्यमंत्री डीके शिवकुमार यांचे एस्कॉर्ट वाहन शनिवारी दुपारी मंड्या जिल्ह्यातील श्रीरंगपटना तालुक्यातील टी एम होसुर गेटजवळ उलटले, त्यात बसलेले चार जण जखमी झाले.

शनिवारी म्हैसूर येथील एका कार्यक्रमाहून बंगळुरूला परतत असताना डी के शिवकुमार यांच्या गाडीच्या मागे येणारी गाडी चालकाचे नियंत्रण सुटल्याने उलटली. या कारमधील जखमी झालेल्यांची नावं महेश, दिनेश, जयलिंगू आणि कार्तिक अशी समोर आली आहेत.

या जखमींना श्रीरंगपटना तालुका रुग्णालयात प्राथमिक उपचार देण्यात आले आणि नंतर पुढील उपचारांसाठी म्हैसूर येथील के आर रुग्णालयात दाखल करण्यात आले. अपघातामुळे वाहनाचे नुकसान झाले आहे.