कर्नाटकात काँग्रेसला प्रचंड बहुमत मिळालं. 22 वर्षांनंतर पुन्हा एकदा काँग्रेसला बहुमत मिळालं. त्यानंतर कर्नाटक काँग्रेसचे प्रदेशाध्यक्ष डी के शिवकुमार आणि विधानसभेचे विरोधी पक्षनेते सिद्धरामय्या यांच्यापैकी कुणाला मुख्यमंत्रिपद द्यायचं यावरून पक्षात चर्चा सुरू आहेत. कुणाच्या हातात राज्याची सत्ता द्यावी यासाठी काँग्रेसमध्ये बैठकांवर बैठका होत आहेत.

13 मेला कर्नाटकचा निकाल लागला त्यानंतर आज चार दिवसांनंतरही कर्नाटकच्या मुख्यमंत्रिपदाचा तिढा सुटलेला नाही. अशातच डी के शिवकुमार यांनी मोठं वक्तव्य केलं आहे. कर्नाटकच्या मुख्यमंत्रीपदावरून काँग्रेसच्या गोटात हालचालींना वेग आला आहे.

दरम्यान, कर्नाटक काँग्रेसचे प्रदेशाध्यक्ष डीके शिवकुमार यांनी मंगळवारी नवी दिल्लीमध्ये काँग्रेसचे राष्ट्रीय अध्यक्ष मल्लिकार्जुन खर्गे यांची भेट घेतली. यावेळी शिवकुमार यांनी खर्गेंकडे मुख्यमंत्रीपदाबाबतची भूमिका मांडली. त्यांनी खर्गे यांच्याकडे मुख्यमंत्री बनण्याची इच्छा व्यक्त केली आहे. तसेच २०१९ मध्ये काँग्रेस सरकार कोसळल्यानंतर राज्यात पक्षाची पुनर्बांधणी करण्यात मदत केली, असंही डीके शिवकुमार यांनी खर्गेंना सांगितलं असल्याची माहीती आहे. याबाबतचं वृत्त ‘इंडिया टुडे’ने सूत्रांच्या हवाल्याने दिले आहे.

यावेळी 'सिद्धरामय्या यांनी याआधी कर्नाटकचं मुख्यमंत्रिपद भुषवलं आहे. त्यामुळे यंदा मला संधी देण्यात यावी, अन्यथा मी केवळ एक सामान्य आमदार म्हणून काम करेन, असं डी के शिवकुमार म्हणाले आहेत.

डी के शिवकुमार यांच्या या वाक्याने काँग्रेसमध्ये पुन्हा एकदा चर्चेला उधाण आलं आहे. डी के शिवकुमार आणि सिद्धरामय्या या दोघांकडून कर्नाटकच्या मुख्यमंत्री पदासाठी रस्सीखेच सुरू आहे. त्यामुळे पक्षश्रेष्ठी यांच्या निर्णयाकडे काँग्रेस नेत्यांसह कर्नाटकच्या जनतेचं लक्ष लागलं आहे.