नवी दिल्ली - भाजपमध्ये असलेले वरुण गांधी मागील काही दिवसांपासून सातत्याने भाजपविरोधी भूमिका घेताना दिसत आहेत. त्यामुळे ते राहुल गांधी यांच्यासोबत जातील, अशी चर्चा आहे. याबाबत काँग्रेसनेते राहुल गांधी यांना भारत जोडो यात्रेदरम्यान पंजाबमधील होशियारपूर येथे पत्रकार परिषदेत वरुण गांधी यांच्या यात्रेतील सहभागाच्या प्रश्न विचारण्यात आला. त्यावर त्यांनी मोठं विधान केलं. ( rahul gandhi-varun gandhi news in Marathi)

राहुल गांधी यांना एका पत्रकाराने विचारले की वरुण गांधी भारत जोडो यात्रेत सहभागी होतील का? त्याला उत्तर देताना राहुल गांधी म्हणाले की, "वरुण गांधी भाजपमध्ये आहेत, जर ते येथे आले तर त्यांच्यासाठी समस्या निर्माण होऊ शकते." माझी विचारधारा त्यांच्या विचारधारेशी जुळत नाही. मी संघाच्या कार्यालयात जाऊ शकत नाही, त्यासाठी माझा शिरच्छेद केला तरी बेहत्तर, असंही राहूल म्हणाले.

माझ्या कुटुंबाची एक विचारधारा आहे. वरुणने दुसरी विचारधारा स्वीकारली आणि ती विचारधारा मी स्वीकारू शकत नाही. मात्र वरुण गांधींना प्रेमाने भेटू शकतो, त्यांना मिठी मारू शकतो, पण आमची विचारधारा वेगळी आहे. माझ्या कुटुंबाची विचारधारा वेगळी आहे आणि आरएसएसची विचारधारा वेगळी आहे. वरुण गांधी यांचा त्या विचारधारेवर विश्वास आहे, असंही राहुल म्हणाले.

वरुण गांधी आपल्या वक्तव्यांमुळे सतत चर्चेत असतात. नुकतेच राहुल गांधी यांनी लाल किल्ल्यावर केलेल्या वक्तव्यानंतर वरुण गांधी यांनीही असेच वक्तव्य केले. ज्यामध्ये वरुण गांधी म्हणाले होते की, देशातील काही लोकांना फक्त हिंदू-मुस्लिम करायचे आहे. विशेष म्हणजे वरुण गांधी यांनी आपण ना नेहरूंच्या विरोधात आहोत, ना काँग्रेसच्या असही म्हटलं होतं.

हे ही वाचा : भारतीयांनी जगाला डिजिटल पेमेंट शिकवायची आलीये वेळ...