Unnao Accident : उत्तर प्रदेशातील उन्नाव जिल्ह्यातील लखनऊ-कानपूर महामार्गावरील आझाद मार्ग क्रॉसिंगवर एका अनियंत्रित डंपरने अनेक वाहनांना धडक दिल्याचा प्रकार समोर आला आहे. तसेच या डंपरने रस्त्याच्या कडेला उभ्या असलेल्या लोकांना देखील चिरडले. या अपघातात अर्धा डझनहून अधिक लोक जखमी झाले. या भीषण अपघातात आई आणि मुलीसह सहा जणांचा मृत्यू झाला.

मिळालेल्या माहितीनुसार, रविवारी रात्री अचलगंज पोलिस स्टेशन हद्दीतील आझाद मार्ग चौकात एका अनियंत्रित डंपरने कार आणि दुचाकीला धडक दिली आणि पादचाऱ्यांना चिरडले. याचबरोबर डंपर चारचाकी वाहनाला ओढत खाईत घुसला.

या अपघातात कारमध्ये असलेले बाप-लेक आणि जावई ठार झाले आहेत. अपघातानंतर ग्रामस्थांनी महामार्ग रोखून धरला. दगडफेक करून रोडवेजच्या बसची तोडफोड देखील आली. त्याला रोखण्याचा प्रयत्न करणाऱ्या हवालदारालाही लोकांनी मारहाण केली. पोलीस अधिकाऱ्यांनी मोठा पोलीस बंदोबस्त घेऊन घटनास्थळी पोहोचून नागरिकांना रस्त्यावरून बाजूला केलं.