काठमांडू/ नवी दिल्ली/देहरादून : नेपाळमध्ये मंगळवारी मध्यरात्री भूकंपाचे तीव्र धक्के बसले. रिश्‍टर स्केलवर त्याची तीव्रता ६.६ ते ६.३ एवढी नोंदली गेली. या भूकंपामुळे सहा जणांचा मृत्यू झाला असून पाच जण जखमी झाले आहेत. तसेच भारतातही राजधानी दिल्लीसह उत्तर प्रदेश, उत्तराखंडसह पाच राज्यांना भूकंपाचे धक्के जाणवले. नेपाळच्या राष्ट्रीय भूगर्भशास्त्र विभागाने दिलेल्या माहितीनुसार, पश्‍चिम नेपाळमध्ये मध्यरात्रीनंतर १. वाजून ५७ मिनिटांनी भूकंपाचा तीव्र धक्का जाणवला. त्याचे केंद्र भारताच्या पिठोरागड येथून ९० किलोमीटर अंतरावर होते. या भूकंपामुळे अनेक घरांची पडझड झाली.

गाढ झोपेत असणारे नागरिक अचानक धक्के जाणवू लागल्याने घराबाहेर पळाले. त्याचवेळी उत्तराखंड-नेपाळ भागात पहाटे ३.१५ वाजता आणि ६.२७ वाजता भूकंपाचे धक्के बसले. त्याची तीव्रता रिश्‍टर स्केलवर अनुक्रमे ३.६ आणि ४.३ एवढी नोंदली गेली. नेपाळच्या भूगर्भशास्त्र विभागाने डोटी जिल्ह्यात २.१२ वाजता भूकंपाचा मोठा धक्का बसल्याचे सांगितले. त्याची तीव्रता रिश्‍टर स्केलवर ६.६ एवढी होती. तत्पूर्वी पश्‍चिम नेपाळमध्ये मंगळवारी रात्री ९.०७ वाजता आणि ९.५६ मिनिटांनी भूकंपाचे धक्के बसले होते. कालच्या भूकंपामुळे झालेल्या विविध दुर्घटनेत सहा जणांचा मृत्यू झाला.

राजधानी, गाझियाबादला धक्के

भूकंपामुळे पश्‍चिम नेपाळ हादरलेले असताना इकडे भारतात नवी दिल्लीसह गाझियाबाद, गुरुग्राम तसेच लखनौत भूकंपाचे धक्के जाणवले. बिहारच्या सीतामढीच्या नेपाळलगत मेजरगंज, सोनबरसा, सुरसंड, परिहार, कन्हौली, बेलासह अनेक ठिकाणी भूकंपाचे धक्के जाणवले. कोणत्याही प्रकारची जीवितहानी झाली नसल्याचे प्रशासनाने सांगितले. उत्तर प्रदेशात काल रात्री साडे आठ वाजता लखनौसह अनेक जिल्ह्यात भूकंपाचे धक्के बसले.