Assembly Election 2022 : देशात कोरोनाचा (Coronavirus) वाढता प्रादुर्भाव असला तरी, 5 राज्यांत विधानसभा निवडणुका होणार आहेत. कोरोनाच्या पार्श्वभूमीवर निवडणूक पुढं ढकलण्याची मागणी होत होती. मात्र, आता निवडणूक आयोग (Election Commission) आज (शनिवार) 5 राज्यांत होणाऱ्या विधानसभा निवडणुकांच्या तारखा जाहीर करणार असल्याचं कळंतय. यात उत्तर प्रदेश (Uttar Pradesh), उत्तराखंड (Uttarakhand), मणिपूर, गोवा (Goa) आणि पंजाबमधील (Punjab) निवडणुकांचा समावेश आहे.

दरम्यान, उत्तर प्रदेश आणि पंजाबसह 5 राज्यांत 2022 मध्ये होणाऱ्या विधानसभा निवडणुकीची तयारी जोरात सुरूय. निवडणूक आयोग लवकरच या राज्यांत होणाऱ्या निवडणुकांच्या तारखा जाहीर करेल, अशी शक्यता वर्तवली जात होती. मात्र, आता आयोग आज दुपारी 3.30 वाजता तारखा जाहीर करणार असल्याचं समजतंय.

वास्तविक, निवडणूक आयोगानं यापूर्वी सर्व निवडणुका असणाऱ्या राज्यांची आढावा बैठक घेऊन तारीख जवळपास निश्चित केलीय. त्यामुळं निवडणूक कोणत्याही क्षणी होण्याची शक्यता आहे. मीडिया रिपोर्ट्सनुसार, सर्वात मोठं राज्य असणाऱ्या उत्तर प्रदेशात 8 टप्प्यात मतदान केलं जाऊ शकतं, तर पंजाबमध्ये 3 टप्प्यात मतदान केलं जाऊ शकतं. याशिवाय निवडणूक आयोग मणिपूरमध्ये (Manipur) दोन टप्पे, गोवा आणि उत्तराखंडमध्ये प्रत्येकी एक टप्पा घेण्याची घोषणा करू शकतं.