भोपाळ : एका २१ वर्षीय तरुणीचं लग्नाच्या तीन दिवसांपूर्वी अपहरण करण्यात आलं. त्यानंतर तिच्यावर तब्बल २१ दिवस बलात्कार करण्यात आल्याची संतापजनक घटना समोर आली आहे. याप्रकरणी भाजप (BJP) नेता आणि त्यांच्या मेहुण्याविरोधात गुन्हा दाखल करण्यात आला आहे. मध्यप्रदेशातील (Madhya Pradesh) सिंगरौली जिल्ह्यात ही घटना घडली.

पीडित तरुणीचं लग्न होतं. मात्र, लग्नाच्या तीन दिवसांपूर्वीच मुलीचं अपहरण झालं. त्याबाबत कुटुंबीयांनी पोलिसांत तक्रार नोंदवली होती. पोलिसांनी चौकशी करत बालाघाट येथून मुलीची सुटका केली. त्यानंतर तिची विचारपूस केली असता धक्कादायक बाबी समोर आल्या आहेत. भाजप नेते कोमल गुप्ता आणि त्यांचा मेहुणा धर्मेंद्र गुप्ता यांनी गुंगीचं औषध देऊन अपहरण केल्याचा आरोप पीडितेने केला आहे. पीडिता जबलपूरजवळ पोहोचल्यानंतर शुद्धीवर आली. त्यानंतर कोमल गुप्ता हे घरी निघून गेले आणि धर्मेंद्र पीडितेला घेऊन बालाघाटला रवाना झाला. तिथे आपल्या नातेवाईकाच्या घरी पीडितेला डांबून ठेवले आणि २१ दिवस तिच्यावर वारंवार बलात्कार केला, असे आरोपी पीडितेने तक्रारीमध्ये केले आहेत.

कोमल गुप्ताने आरोपीची मदत केल्यानंतर दोघांविरोधात देखील गुन्हा दाखल करण्यात आला आहे. पीडितेच्या तक्रारीनंतर सिंगरौली पोलिसांनी धर्मेंद्रला अटक केली असून भाजप नेता कोमल गुप्ता अद्यापही फरार आहे. त्याचा शोध सुरू असल्याचं सिंगरौलीचे पोलिस अधीक्षक विरेंद्र प्रताप सिंह यांनी इंडिया टुडेसोबत बोलताना सांगितलं.